تجارب شهر كامل | منتجات كتير فرقت في صحتي

بما انه فكرة مراجعة مفضلاتي أو المنتجات اللي استخدمتها خلال الشهر عجبتكم، فخلاص قررت اثبتها، ونهاية كل شهر هراجع معاكم كل المنتجات اللي استخدمتها خلال الشهر ده، والنهاردة هتكون مراجعة مفضلاتي لشهر يوليو، وحتى الحاجات اللي جربتها وماعجبتنيش برضو هقولكم عليها وماحبيتهاش ليه.. وطبعا انتم عارفين المراجعة دي بتكون بسيطة ومختصرة لان مش بندخل أوي في تفاصيل عميقة زي المراجعات اللي بتكون خاصة بشيء معين، لكن دي بتكون خلاصة تجربتي مع منتجات جديدة استخدمتها لمدة شهر كامل على الاقل بعد ما بكون اخترتها بعناية

مفضلاتي لشهر يوليو.. القليل من المكملات الغذائية والكثير من منتجات العناية بالشعر، دي كانت السمة العامة لمعظم المنتجات اللي استخدمتها طول الشهر.. تسألوني ليه؟ أقولكم عشان انا طول شهور الصيف لو ماهتمتش بشعري بيبقى شبه المقشة.. بصوا أنا من زمان جدا بطلت استخدم اي ادوات بتستخدم الحرارة لتصفيف الشعر، وحتى منتجات العناية الكيماوية بطلتها من زمان، كل ده وانا أساسًا طبيعة شعري بتميل للجفاف شوية، فمع الحر والرطوبة الغير منطقية دي بقى تخيلوا يا بنات ممكن يحصل ايه.. تتخيلوا ليه مانتو اكيد عارفين.. بس عشان مانزعجش الرجال اللي معانا بتفاصيل كتير هما غالبا مش مهتمين بيها، خلونا الأول نتكلم عن المكملات البسيطة اللي استخدمتها الشهر ده، وبعد كدة نقعد احنا بقى مع بعضينا نتكلم عن الزيوت والكريمات والشامبوهات وناخد راحتنا بقى.

المنتجات الجديدة اللي استخدمتها خلال شهر يوليو:
في مراجعة مفضلاتي لشهر يوليو، جربت مجموعة جديدة من المنتجات لأول مرة، وكانت موزعة بين مكملات غذائية أساسية، منتجات طبيعية للعناية بالشعر، زيوت نقية، وقطرة ترطيب للعين.. بعضها أعجبني جدًا واستمرّيت عليه، وبعضها ماكانش بالمستوى المتوقع.

ودي قائمة بكل الحاجات الجديدة اللي دخلت روتيني خلال الشهر ده:
بروبيوتك - Probiotics

إن-أسيتيل سيستين -  NAC 1000 mg

إس أسيتيل إل-جلوتاثيون -  S-Acetyl L-Glutathione

قطرة مرطبة للعين بعسل المانوكا - Manuka Dry Eye Drops

سيروب بدون سكر بمونك فروت وأليلوز - Zero Sugar Simple Syrup with Monk Fruit & Allulose

شامبو بالمانجو - Island Mango Shampoo

بلسم بالمانجو - Island Mango Conditioner

كريم تصفيف بجوز الهند - Coconut Soft Curls Hair Cream

لوشن خفيف للشعر بجوز الهند - Coconut Shine & Refine Hair Lotion

زيت الأملا الطبيعي - Organic Amla Oil

زيت الأرجان النقي - Pure Organic Argan Oil