«Վերնատուն»․ Եվրոպացի լինելը քաղաքակրթական ընտրություն է․ Ռուբեն Բաբայան 13․12․2025

«Ես խորին համոզմունք ունեմ, որ մենք եվրոպացիներ ենք՝ էությամբ, կրթությամբ, արժեքային համակարգով և մշակութային ժառանգությամբ»,– նշում է ռեժիսոր Ռուբեն Բաբայանը՝ խոսելով Հայաստանի ու Եվրոպայի քաղաքակրթական առանձնահատկությունների մասին։

Նրա բնորոշմամբ՝ մշակույթը միայն գիրքն ու գրականությունը չէ, այլ այն արժեքային համակարգն ու քաղաքակրթական ընտրությունը, որը կատարում է մարդը։ Մշակույթ կրողն ինքն է ազդում իր կենցաղի վրա. «Եթե քո մեջ մշակույթ ես կրում, ապա փոխում ես նաև շրջապատդ։ Հակառակ դեպքում՝ սկսում ես արդարանալ, թե շրջապատն է այդպիսին, ժողովուրդը կամ կենցաղը, և եթե ուրիշներն անում են, ուրեմն ես էլ կարող եմ անել»։

Ռուբեն Բաբայանն ընդգծում է, որ հայ ժողովուրդը միշտ բաց է եղել այլ քաղաքակրթությունների առաջ՝ վերցնելով նորն ու տալով սեփականը։ Ըստ նրա՝ մշակույթն ու աշխարհն ապրում են «բաց անոթների» սկզբունքով։ Հենց փակում ես այդ անոթները՝ իբր ազգային ինքնությունը պահպանելու պատրվակով, միանգամից կաթվածահար ես լինում։

Բաբայանի համոզմամբ՝ եվրոպացի լինել նշանակում է ունենալ «կուշտ աչք», ինչը կապված չէ ֆինանսական հնարավորությունների հետ։ Դա նախևառաջ հարգանքն է ուրիշի կարծիքի, մտքի ու կյանքի հանդեպ, ժամանակի զարկերակը զգալու և անդադար սովորելու ձգտումը։ «Սովորելը երիտասարդության նշան է և կյանքի մոտիվացիա՝ ցանկացած տարիքում»։

«Որքան շատ բացվենք դեպի Եվրոպա, այնքան ավելի կզգանք, որ եվրոպական ընտանիքի հավասար անդամ ենք, որն ապրում է հստակ և մեզ համար շահավետ կանոններով։ Դու չես կարող մտնել ֆուտբոլի դաշտ և խաղալ ռեգբիի կանոններով։ Պետք է փոխվել, զարգանալ, լինել ժամանակակից, հանդուրժող և սովորել կրել մշակույթը դրա լայն իմաստով»,- եզրափակում է Ռուբեն Բաբայանը։