RC MRINDOKO AKAGUA DARAJA LA IKONDAMOYO, ATOA WITO WA ULINZI NA UTUNZAJI WA MIUNDOMBINU.

Mkuu wa Mkoa wa Katavi, Mhe. Mwanamvua Mrindoko, amefanya ziara ya kikazi kukagua daraja la Ikondamoyo lililopo katika Kijiji cha Ikondamoyo, Kata ya Uruwira, Halmashauri ya Wilaya ya Nsimbo, mkoani Katavi, lililojengwa kwa lengo la kuimarisha huduma za kijamii na kiuchumi kwa wananchi wa eneo hilo.

Daraja hilo ambalo hapo awali lilikuwa kikwazo kikubwa katika utekelezaji wa shughuli za maendeleo na utoaji wa huduma muhimu, sasa limeongeza urahisi wa usafiri na usafirishaji, hususan katika kipindi cha mvua.

Akizungumza na wananchi, RC Mrindoko ametoa wito kwa wananchi wote kushirikiana na Serikali katika kulitunza daraja na barabara hiyo ili iweze kudumu kwa muda mrefu, akisisitiza umuhimu wa kuacha vitendo vya wizi wa miundombinu hususan vyuma na nondo, pamoja na kuepuka shughuli za kilimo pembezoni mwa barabara ambazo husababisha uharibifu wa miundombinu.

“Natoa wito kwa wananchi wote kulinda na kutunza daraja na barabara hii. Serikali imewekeza fedha nyingi kwa ajili ya maendeleo yenu, hivyo ni wajibu wetu sote kuhakikisha miundombinu hii inalindwa na kudumu kwa muda mrefu,” amesema Mhe. Mrindoko.

Aidha, amemtaka Meneja wa TARURA Mkoa wa Katavi kuhakikisha maboresho madogomadogo yanayohitajika yanafanyika kwa haraka, ikiwemo uwekaji wa mawe pembezoni mwa barabara ili kuzuia mmomonyoko wa udongo na kuongeza usalama wa miundombinu hiyo.

Kwa upande wao, wananchi wa Kijiji cha Ikondamoyo, Halmashauri ya Wilaya ya Nsimbo, wameishukuru Serikali ya Awamu ya Sita kwa ujenzi wa daraja hilo, wakieleza kuwa awali walikuwa wakikumbwa na changamoto kubwa za usafiri na utekelezaji wa shughuli za maendeleo, huku wanafunzi wakishindwa kufika shuleni kwa wakati, hali ambayo sasa imepatiwa ufumbuzi.

@ortamisemi @maelezonews @msemajimkuuwaserikali @tarura_tanzania @nsimbodctz