“Janullatos erdhi si një prift nga Greqia, sot ndahet nga ne si Anastasi i Shqipërisë”

Kryeministri Edi Rama ka mbajtur një fjalim në liturgjinë hyjnore dhe shërbesën e varrimit të Kryepeshkopit Anastas Janullatos. Kreu i qeverisë theksoi se 33 vite më parë Anastas Janullatos erdhi në vendin tonë si një prift nga Greqia e sot ndahet nga mesi ynë si Anastasi i Shqipërisë.

“Sot më takon të kujtoj në nderin e tij diçka që shumë e kanë parë apo e kanë ndjerë dhe shumë të tjerë s’e kanë kuptuar apo s’kanë dashur ta besojnë. Por që në fund të fundit ai vetë e dëshmoi në 33 vjet dhe e dëshmon dhe sot, me trupin që la këtu, në tokën e Shqipërisë, i cili me kërkesën e tij do varroset në këtë katedrale dhe siç ngjallje kishte kuptim emri i tij. Në këtë ditë të mbylljes së ciklit të një jete kushtuar ngjalljes duhet thënë se në përmasën e vetme që atij i interesonte, atë të fesë, Anastasi erdhi mes nesh 33 vjet më parë si një prift nga Greqia dhe pas 33 vjetësh më pas ndahet nga mesi ynë si Anastasi i Shqipërisë”, tha Rama.

Kreu i qeverisë vlerësoi rolin e Kryepeshkopit Anastas Janullatos. Ai u shpreh se Janullatos identifikohej me krenari dhe përkushtim me emrin e Shqipërisë.

“Duhet pranuar se është vështirë të gjendet në kujtesën tonë historike dikush i çfarëdo kombësie tjetër që të ketë qenë që jetë identifikuar me aq krenari dhe përkushtim, me fjalë dhe me vepra me emrin e Shqipërisë sa kryepeshkopi Anastas. E di që ka plot shqiptarë që nuk pajtohen me këtë që thashë, por durim dhe ata le të kundrojnë në reflektim të paqtë dhe natyrisht të çliruar nga paragjykimet apo dyshimet fqinjësore, vetëm disa nga veprat e tij, ku ashtu siç njihet pema e mirë nga frytet e saj, lexohet pa asnjë ekuivok edhe identifikimi i tij me Shqipërinë tonë. Sot dëgjohet në diptikët e shenjtë, në të gjitha gjuhët liturgjike të ikumenesë ortodokse emri i kryepeshkopit të Shqipërisë, i renditur menjëherë pas selive patriarkale dhe dy kishave më të vjetra autoqefale, asaj të Qipros dhe të Greqisë. Kur e dëgjon këtë përnderim liturgjik është e pamundur të mos jesh thellësisht mirënjohës njeriut që përcjellim sot, aq më tepër po të mos harrosh se pas shkrirjes në flakën 23-vjeçare të ferrit ateist Kisha Ortodokse Autoqefale e Shqipërisë ishte vetëm hija e një kujtimi. Ekzistenca e kësaj kishe me frymën që për 33 vite i dha bariu i saj, Anastasi i Shqipërisë është mirëfilli sot një aset konstituiv i vetë pavarësisë, integritetit dhe sovranitetit të Republikës së Shqipërisë, një kishë e lirë në një shtet të lirë”, tha Rama.

Kreu i qeverisë solli edhe një deklaratë të Kryepeshkopit Anastas Janullatos para pak kohësh që hedh poshtë paragjykuesit e tij, vetëm se ai ishte grek. Bëhet fjalë për intervistën, ku Janullatos tha se pasuesi i tij duhet të jetë shqiptar dhe se në Shqipëri shkuan për të ringritur kishën e jo për bërë një koloni.

“Për të gjithë paragjykuesit të tij prania e këtij trupi pajetë të rilindësit të kishës autoqefale të Shqipërisë, pohimi i tij botërisht, vetëm para pak kohësh në një intervistë të dhënë për shtypin grek e cila tingëllon më shqip sesa shqipja e kujtdo që e ka paragjykuar vetëm e vetëm se ai ishte grek krye[peshkopin e ortodoksëve shqiptarë, i cili tha, pasuesi im do të jetë shqiptar. Unë kam që në vitin 1963 që udhëtoj nëpër botë. Kam mësuar ta respektoj tjetrin siç është. Të mendoj për të drejtat e tij. Imagjinoni të kishim në Greqi një situatë të ngjashme, a do ta pranonim të drejtonte kishën e Greqisë, një bullgar, apo një serb? Sigurisht që jo. E konsideroj të mirëqenë që pasuesi im të jetë shqiptar. Ne nuk shkuam në Shqipëri për të bërë një koloni, ne shkuam për të bërë një Kishë Autoqefale të Shqipërisë. Ajo nuk është pjesë e kishës së Greqisë, ajo është një ndër 14 kishat ortodokse autoqefale të botës, e mbyll shprehjen e tij lapidare kryepeshkopi ynë”, tha Rama./tvklan.al

SUBSCRIBE to "RTV KLAN" on YouTube for more videos!
Për më shumë informacione vizitoni faqen tonë web https://tvklan.al/kategoria/klan-news/
Follow Klan News on Facebook:   / klannews  
Follow @klannews on Instagram:   / tvklannews  
#KlanNews #KlanNewsLajme #TvKlan