Алматының Бас жоспарына түзетулер енгізілмек

Алматының Бас жоспарына түзетулер енгізілмек. Қала инфрақұрылымын жақсарту мақсатында мемлекет бірқатар жер учаскесін сатып алады. Мысалы, Алматы хайуанаттар бағының айналасындағы аумаққа реконструкция жүргізіліп, келушілер үшін қолайлы жағдай жасалады. Қоғамдық талқылау биылғы жылдың 24 желтоқсанында басталып үш күнге созылады.
АЯУЛЫМ ИЗАТҚЫЗЫ, тілші:
Алматы облысынан қала құрамына жаңа аумақтар қосылып, мегаполисте 29 жаңа шағын аудан пайда болды. Онда 170 мыңнан астам адам тұрады. Сондай-ақ, тау бөктеріндегі бақылаусыз құрылыс қалаға қосымша салмақ түсіріп келген. Сондықтан жаңа қосылған аймақты инфрақұрылыммен толық қамту үшін таулы аймақтардағы құрылыс жұмыстарына мораторий енгізіледі.
Қала билігінің айтуынша, Алматының жоғарғы бөлігінде көпқабатты тұрғын үйлер салуға толық тыйым салынады. Бұған қоса, бизнес орталықтар да бой көтермейді. Тек әлеуметтік инфрақұрылым мен туризм бағытындағы нысандарға ғана рұқсат беріледі.
АСХАТ САДУОВ, «АЛМАТЫГЕНПЛАН» ҒЗИ Бас Директоры:
Қаладағы жел ағымын ескере отырып, ғимараттардың қабат санын шектейміз. Мысалы, Әл-Фараби даңғылының бойына 3 қабаттан, ал Абай даңғылында 9 қабаттан артық ғимарат салуға болмайды. Дәл осылай қаланы бірнеше бөлікке бөліп, сол бойынша құрылыс жоспарларын жасаймыз.
Мораторий тек жаңа құрылысқа қатысты. Бұрын рұқсат алған жобалар өз мерзімінде жүзеге асырылады. Сондай-ақ, мегаполистегі құрылыс саясатын қалыптастырудағы маңызды бағыттардың бірі - қаланың полицентрлі даму моделі. Қазір мегаполисте барлығы бес полицентр қарастырылған.
БЕЙБІТ ШАХАНОВ, Алматы қаласы әкімінің орынбасары:
Біз әр полицентрді қайта құру нұсқаларын әзірлеп отырмыз. Бұл қалалық белсенділіктің тең бөлінуіне мүмкіндік береді. Полицентрлер аясында әлеуметтік және коммерциялық инфрақұрылымды тең дамытуды жоспарлап отырмыз. Барлық аталған шаралар Бас жоспардың түзетулерінің негізін құрайды. Қоғамдық тыңдаулар 24 желтоқсанда басталып үш күн бойы өтеді.
Ресми дерекке сүйенсек, биыл мемлекет қажетті инфрақұрылым салу үшін 994 жер телімін сатып алған. Оның 74 пайызы – көлік инфрақұрылымына, қалғаны әлеуметтік нысандарды дамытуға арналған.



#Информбюро #31арна #БастыЖаңалықтар #Новости #31канал