Bakının bu hissəsində “xruşovka”lar niyə sökülür?

#APATV

Paytaxt Bakının abadlaşdırılması məqsədi ilə Yasamal rayonu Şərifzadə küçəsi 192 ünvanında yerləşən “xruşovka” ların mərhələli şəkildə söküntüsünə başlanılıb.

Bu barədə APA TV-yə açıqlamasında Yasamal Rayon İcra Hakimiyyətinin baş memarı Eyvaz Bağırov bildirib. Onun sözlərinə görə, mərhələli şəkildə həmin ərazidəki bir neçə bina söküləcək: “Bütövlükdə Yasamal rayonunda 360-dan yuxarı “xruşovka” dediyimiz, yəni o dövrdə tikilmiş beş mərtəbəli binalar söküləcək. Onlardan 30-a yaxını dörd mərtəbəlidir. Ömrünü yaşayıb bitirmiş binalardır. Konkret olaraq Şərifzadə küçəsi 192 saylı ünvanda binanın sökülməsindən söhbət gedir. Yəni burada şirkət tərəfindən sakinlərlə razılıq müqavilələri bağlanır və onlar köçürülür”.

Qeyd edək ki, yeni binalar Bakı Şəhər icra hakimiyyətinin sərəncamı ilə tikiləcək. Tikintini icra edən şirkətin iş icraçısı İlqar Nuriyevin sözlərinə görə, sökülən binaların yerində beş bloklu 3 ədəd 14 mərtəbəli, 2 ədəd 12 mərtəbəli yaşayış binaları inşa olunacaq: “Ümumiyyətlə bütün binalarımız tam təmirli şəkildə və öz evlərindən 20-25% artıq sahədə evlər verilir. Evi tərk etdikləri gündən yeni evə köçənə qədər kirayə haqqı ilə tam təmin olunurlar. Mənzilin istilik sistemi, qazı, suyu bütün kommunal xətlər bugünkü mövcud tələbata uyğun həyata keçirilir”.

Şirkətin iş icraçısı bildirir ki, sakinlərinin hamısı müqavilə əsasında razılaşdıqdan sonra bina 2 ilə təhvil veriləcək.

Söküntü işlərinə nə zamana başlanacaq sualına gəlincə isə, “sakinlərinin çox hissəsi artıq müqavilə əsasında razılaşdırılıb, lakin bəzi sakinlər var ki, onlar ümumi qəbul edilmiş qaydalarla razılaşmır, onlar da tam şəkildə razılaşdıqdan sonra binanın sökülməsinə icazə veriləcək” - deyə Yasamal Rayon İcra Hakimiyyətinin baş memarı əlavə edib.

Layihə Dövlət Şəhərsalma və Arxitektura Komitəsi tərəfindən təsdiqlənib.

Nərmin Murad,
Kamran Namazov,
APA TV

#qəzalıbinalar #sökülən binalar



✅ Rəsmi saytımız: https://apa.tv
✅ Rəsmi facebook səhifəmiz:   / tvapaxeber  
✅ Rəsmi instagram səhifəmiz:   / apatvresmi  
✅ Rəsmi twitter səhifəmiz:   / apatvofficial  
✅ Rəsmi teleqram səhifəmiz: https://t.me/apa_tv
✅ Rəsmi youtube kanalımız: https://www.youtube.com/APAGROUPOffic...

Copyright © APA TV