Кредит жүктемесін қалай дұрыс есептеу керек?

БАҚ-пен жұмыс істеу бөлімінің басшысы Азамат Кенже кредит жүктемесін қалай дұрыс есептеу керектігі жайында айтып берді:

"Кредит жүктемесі немесе борыш жүктемесі коэффициенті (БЖК) - қарыз алушының барлық өтелмеген қарыздары бойынша төлемдердің ай сайынғы кірісіне қатынасы ретінде есептеледі. Заң талаптарына сәйкес, банктер мен микроқаржы ұйымдары қарыз алушыға қарыз беру туралы шешім қабылдағанға дейін борыш жүктемесі коэффициентін міндетті түрде есептейді. Бұл қарыз алушының төлем қабілетін бағалау үшін қажет.

БЖК қандай деңгейден аспауы керек?
Банктерде және микроқаржы ұйымдарында кредиттер ресімдейтін азаматтар үшін борыш жүктемесі коэффициентінің шекті мәні 0,5-ті құрайды, яғни ай сайынғы төлем қарыз алушының ай сайынғы кірісінің жартысынан аспауға тиіс.

Қарыздар бойынша төлемдердің есебіне міндеттемелердің барлық түрлері, яғни ипотекадан микрокредиттерге дейін кіреді. Тіпті нақты пайдаланылмайтын кредит карталары бойынша лимиттер де есепке алынады. Кіріс ретінде тиісті құжаттармен расталған түсімдер алынады: жалақы, стипендия, зейнетақы төлемдері, кәсіпкерлердің салық аударымдары және басқа ақпарат.

Мысалы: егер адам бірнеше қарыз бойынша айына 100 000 теңге төлесе, ал оның айлық кірісі 300 000 теңгені құраса, онда оның борыш жүктемесі коэффициенті – 0,3 құрайды.

Бұл – кірістің 30%-ы борыштық міндеттемелерді өтеуге жұмсалады деген сөз, бұл деңгей Қазақстанда банктер мен микроқаржы ұйымдары үшін қолайлы болып саналады. Борыш жүктемесі коэффициенті 0,5-тен жоғары болғанда қарыз алушыға қарыз немесе микрокредит беруден бас тартылады.

Кредит жүктемесін қалай азайтуға болады?

Кредит жүктемесін азайту – әсіресе жүйелі түрде әрекет етсеңіз, дұрыс шешім. Барлық берешек пен бөліп төлеуден бас тартудың қажеті жоқ. Бюджетіңізді оңтайландырып, мойныңыздағы міндеттемелермен жұмыс істесеңіз жеткілікті.
Бірнеше тиімді әдістер:
– кредит карталарын жабу немесе лимиттерді азайту - тіпті пайдаланылмаған карталар борыш жүктемесі коэффициентін өсіреді;
– қайта қаржыландыру арқылы бірнеше кредитті бір кредитке біріктіру;
– ұсақ берешекті мерзімінен бұрын өтеу - бұл ай сайынғы төлемдердің сомасын азайтады;
– орташа айлық кіріс мөлшерін ұлғайту үшін бейресми кірістің бір бөлігін заңдастыру;
– қажетсіз шығыстарды азайтып, қаражатты қарыздар төлеуге жұмсау.

Бұл шаралар борыш жүктемесі коэффициентін азайтуға ғана емес, қаржылық тұрақтылығыңызды жақсартуға да көмектеседі."

#ҚНРДА #кредитжүктемесі #қаржылықсауаттылық