محمد بن الذيب

صوت البلوشي والقلوب تتوق
بابيات أبو هذال مدهشنا

خلف لا جا منبر ماهو بمسبوق
شوّش بعبدالله وشوّشنا

شعار لمن مرّنا طاروق
على جناح الريح عرشنا

جعل السحاب اللي معاه بروق
يحن رعده لين يدوشنا

خل الغَنَج يالفارع الممشوق
اللي بنظراتك تحارشنا

عليه مرفوق وعلي مرفوق
انحن على وصلك تهاوشنا

الشوق وسط قلوبنا مدفوق
واللي تعبر عنه اخششنا

مهوب جوك هيد يالغرنوق
عيوننا طيار واكششنا

لو حبنا في روسنا مدقوق
كلاب خلق الله تناهشنا

يابدو ياللي تتبعون النوق
مرباعكم ذا العام واحشنا

لكن من بين البلاد فروق
لو ريحة الزملوق تنعشنا

تسد يالمشمش عن الزملوق
زملوقكم معكم ومشمشنا

معنا ومادام الحياة وفوق
الله بتوفيقه يشرشنا

أذّن مئذّنا وحنا طوق
واللي خطب فينا محششنا


واذناب ود وهات جاها عوق
طاشت وحنا ما بعد طشنا

شهبندر التجار وأهل السوق
شنيتنا واحنا محن نشنا

كانك تقول إن كرتنا محروق
لاتفتكر فينا وطنشنا

عيال مرزوقة مثل مرزوق
في هذه لحدن يناقشنا

طرش لنا طبل وكديش وبوق
واحنا ماتلقى من يطرشنا

تبغي تهمشنا ياذا المخلوق
الوقت مايقدر يهمشنا

ما ذاقوا الأجواد منه تذوق
في المقبلات إن كان حن عشنا

أبلشتنا في حارس الصندوق
يوم انسرق والوقت مبلشنا

مافي بطن صندوقك المسروق
الا طفشك اللي مطفشنا

لا تجيبها من تحت ولا فوق
هذي مخابينا و فتشنا

وادخل مع البيبان يامطفوق
مالك طريقن مع درايشنا

لاتقول كلّش ماعليك حقوق
كلّشك ماهو مثل كلّشنا

استأذنك يا عهدي الموثوق
غير احترام الذات ما حشنا

حنا نحب ابن الملك فاروق
حتى لو انه ما يبخششنا