أحمد بن سالم & علي ال مالك & عبدالهادي الحبابي- جمع آل خاطر ( حصرياً ) 2025

الكلمات ::


لاذعذع الغربي وهب النود وانساق النسيم
بدا الخيال يْهيم بإحساسه ويختال اقلمه

من كثر مايسبح بتصويره مع الفكر ويهيم
لو تطلبه يرسم لك المستقبل الجاي ارسمه

ماعاد أدور لي معه صاحب ولاأدوّر نديم
لا من تعلّى فوق هام الشعْر ويرِف اعلمه

كنّه يبي يروي قصص للكهف وأصحاب الرقيم
وكنه يسولف لك عن أمجاد الصحابي عكرمه

حنا تخاوينا ومنهجنا على النهج السليم
ياجعلني ماأقولها له في غيابه وعْدمه

والليل هذا ليلٍ أبلج ماهو بـ ليل عتيم
بيض الوجيه اللي ماتجعل في دجا الليل اظلمَه

باسم ال خاطر والقشاعا شذرة السيف الصريم
يامرحبا ترحيبةٍ مثل المزون المردمه

قبيلةٍ مقدامها ترثة حشيمٍ من حشيم
طب الكبود اللي من صدوف الليالي مفحمه

والشيخ سالم راعي الوقفات والكف الكريم
مقدم بني عمٍ فعايلهم بروس المرزمه

الشيخ والدكتور والمسؤول والشهم العديم
كل الصفات الطيبه تاخد من صْفاته سمه

إليا نصيته وانت متضايق وميقافك سقيم
ماتطلع إلا وأنت مستانس وهمّك ترجمه

وعبدالعزيز اللي شهر صيته على النهج القويم
ياسِعد من حطك يابوسالم لاشانت محزمه

عسى السعد والخير والتوفيق فالٍ مستديم
للشاجع اللي لو همومك مثل سنجار دْهمه

الشامخ اللي فزعته تنشاف في الليل البهيم
والحاتميّ اللي مانلقى مثل جوده وْكرمه

وربعه سْيوفٍ تردع العدوان وتدك الخصيم
كم من عقيدٍ لاوقف قدامهم ضاق انْسمه

جمع آل خاطر والقشاعا لاأحتمى اليوم العظيم
فزعاتهم يامن بها المكروب ويسج قْدمه

أهل الكرم ، وأهل العطا ، وأهل المقام المستقيم
وأهل الصدور الواسعه وأهل القلوب المرحمه

أشوارهم تمشي عليها الناس من وقتٍ قديم
وسلومهم مثل الدليل اللي بحكم المحكمه

واليوم ننعم في بلاد الخير والقايد رحيم
في صفحة التاريخ سجّل للتطور ملحمه

شفنا التطور وأزدهار الفكر والراي الحكيم
ايحقق المستقبل القادم قبل لا نحلمه

كلمات الشاعر / عامر العزيذي


#أحمد_سالم
#جمع_ال_خاطر
#عبدالهادي_الحبابي
#علي_ال_مالك