【 2025年12月23日 快必開往拔摩島的航程 - 第1934日】

【 2025年12月23日快必開往拔摩島的航程 - 第1934日】

//平安夜前夕收到快必寄出嚟同大家講Merry Christmas嘅信。信嘅內容係咁嘅～//

1)希望收到呢封信嘅時候，仲嚟得切同大家講句Merry Christmas and Happy New Year! 聖誕節喺船上係大節日，大節日會加餸，晚飯有雞髀食！仲有，教會送嘅禮物包，通常都有往往仙貝、迷你麥提莎， Wasabi青豆、魷魚絲， 10包8包細細包嘅小食，仲有一張2026年嘅年曆咭，以及叫人信教嘅單張。我諗返起以前我喺街頭派單張，而家收單張，嗯，幾好吖！

2)我喺開往拔摩島嘅慢船已經五年四個月了，依家又到咗年尾，過埋出年聖誕，如無意外，（如無意外啦，意外嘅嘢都講埋嘅）我就可以倒數四個月，咁就可以落船。我喜歡行山，所以就用上山落山嚟比喻啦，依家已經係落山嘅最後一段路程了。不過，我都時刻儆醒，同自己講：「不要以為落山就一定一了百了，落咗山之後，可能又有另外一個山要上」，可能係關之琳老竇關山、粵語長片嘅關海山、或者梁山⋯⋯

3)無論上山定係落山，我嘅人生已經喺呢個山到經過咗五年幾，我成日都問自己，我到底經歷咗啲乜嘢，有冇枉費到呢啲行山時光？有冇錯過咗啲乜嘢呢？我行完呢個山，落山嘅時候，有啲咩改變呢？我同自己講：nothing is a waste of time if you use the experience wisely。求祢指教我們數算自己的日子，好叫我們得着智慧之心。喺荔枝角嘅時候有同學同我講話「好似日日浪費咗呢幾年咁」。我同佢講，睇吓你點樣「善用」呢幾年日子啫。後來，佢去咗赤柱，我就嚟咗石壁，希望佢有「善用」每一日，我覺得自己就有善用了！

4)我成日話聖誕節係悲慘嘅， 臨盤嘅馬利亞冇得屋企返，冇得去醫院，冇客棧落腳，耶穌要喺馬槽出生，一開始就已經係好悲慘嘅故事。好彩，過完聖誕就係新年，新開始，唔知大家2025年嘅心願，有冇一一實現呢？ 無論有冇實現，2026年，又可以重新許個心願了，係唔係好西西弗斯呢？我呢個月入咗本卡繆嘅西西弗斯的神話，睇完之後，再同大家一齊快必讀贏。睇過嘅朋友，可以寫信同我交流一下喎。

5)聖誕節，唔知大家有冇出外旅遊呢？又返鄉下——日本？我都好多朋友喺日本住，又有好多朋友成日去日本旅行。有朋友問我點睇10月上任嘅首相高市早苗？佢呀，嘩，一上任無耐就搞到中日交惡，搞到去日本嘅大陸團cancel晒，中國人冇得去日本，好衰啫！其實，中國人梗係唔好去日本啦，做乜俾錢佢哋賺，益晒佢哋啫？！應該留返喺中國旅遊消費，咁樣先愛國㗎嘛！

6)不過，我見到高市早苗個名又嬲唔落喎，因為佢嘅姓-高市英文係Takaichi, 睇起上嚟有啲似我個名，就係我嘅名得志Takchi，中間加咗AI, 即係「得AI志」，係咪好潮，好有現代啟示錄feel，係咪？仲有15/16個月落船，到時AI會發展成點呢？我落後咗咁多，會唔會追到呢？呢啲，我都仲未諗咁多，我只係仲諗緊上船前用緊iPhone 11，而家iPhone出到10幾啊？落船嘅時候，好唔好都用返iPhone ？大家又俾啲意見我吖！

7)我個朋友大狀寳蓮，佢又係啱啱去完北海道浸溫泉喎，佢喺北海道都用鉛筆寫信俾我，好開心呀！除咗好掛住佢，我都好掛住北海道！因為「情書」、因為「中山美穗」，我鍾意北海道，又因為睇咗日劇「First Love」嘅介紹，家人話套劇好好睇，所以我又再鍾意北海道，落船之後真係要同家人去一趟喎！

8)每年聖誕節，我都為大家推介呢首歌「Mary, did you know?」其實係我兩個外甥女先介紹俾我嘅。雖然我當呢首歌係聖誕歌，但佢哋話其實唔係， Mary, did you know that your baby boy would one day walk on water ？（大家可以喺YouTube搵到呢個版本   • [SING-ALONG VIDEO] Mary, Did You Know? – P...  ） 你知唔知道當你親吻佢面頰時，你係親吻緊上主呢？好浪漫又震撼嘅一首歌。以前，我喺街頭報佳音，會改編一啲聖誕歌，但呢首太浪漫了，我一直都冇改過歌詞。大家可以上網搵嚟聽吓。我手上有幾本詩歌集，呢排，我都會唱吓O come O come Emmanuel, O holy night, It came upon the midnight clear, Let all mortal flesh keep silence，都係好聽嘅歌，好有聖誕feel 㗎。

~我預備咗嘅聖誕禮物俾大家，係12月24號平安夜講章仲有12月25號聖誕日講章，希望大家喜歡呢份禮物啦！

9)快必嘅回信嚟到呢一度。未到你嘅話，請俾啲耐性。過完聖誕，就快農曆新年，如果你仲未寫過信俾快必嘅話，唔好懶、唔好怕羞，買張靚靚嘅賀年卡，賀吓佢啦，寄埋俾慢必都好㗎 ！如果你好耐冇寫過信俾佢嘅話，就請快啲加入返筆友嘅行列，因為收到你哋嘅信，對佢嚟講係好大嘅支持同鼓勵，佢仲有15個月左右要捱呀！

~提醒一下，寫信、寄卡，記住唔可以有閃粉、唔可以有貼紙，唔可以用訂書釘，亦都唔可以係3D凸出嚟嗰種喎，但係燙金燙銀嗰一啲就OK嘅！

來信請寄去：
香港七姊妹郵政局
郵政信箱60141號
（PO Box 60141
Tsat Tsz Mui Post Office, HK）