【 2025年12月27日 快必開往拔摩島的航程 - 第1938日】

//放假前夕，收到船上孤獨的美食家嘅信，講飲講食。//

1)聖誕節，大家開party，有冇食蘑菇煙肉飯或意粉呢？今年我嘅中同是否和上年的聖誕、上上年、上上上年嘅聖誕一樣，煮啲味一齊慶祝諷刺我呢？我一點都唔介意，佢哋越mean越反諷，我越覺得被紀念啊！

2)最近圖書館睇到一本陶傑嘅文集，裏面有一篇叫「蔥油拌麵」，如果我在外面，也會趁假期，自己整一碟和家人分享。孤獨的美食家，做蔥油拌麵，不是用上海麵，是用最幼的意大利粉中Angel hair天使幼麵來做煨麵的。

3)孤獨的美食家的做法是這樣的：在大煲內放水，要放多一啲，加入天使幼面，一包500g，正常按每人80-100 g嘅份量，如果大食啲，肚餓啲，或者我落船餓咗幾年，可能食到200 g。天使幼麵好快腍，我鍾意食腍啲，所以會煮5分鐘左右。意大利人煮法，唔會過冷河，不過中西合璧，美食家會用過冷河方法，因為係煨麵吖嘛！

4)煮麵之前，要預先準備好啲蝦米。準備蝦米嘅功夫，係用紹興酒浸個面，唔使太多，啱啱浸個面就可以了，浸腍之後就剪碎備用。其他要準備嘅材料，當然係蔥粒啦，蔥白和蔥綠要分開，燒紅個鑊落生油，油滾咗就落蝦米同蔥白，收中火慢慢炒到啲蔥粒黑黑地，加埋蔥綠，再兜多幾下，夾起，跟住落豉油、老抽、糖同些少紹興酒喺蔥油入邊，加返啲蔥同蝦米粒，熄火，將蔥油汁淋喺煮好嘅天使幼麵上，就食得了。呢個係孤獨的美食家版本嘅蔥油拌「天使幼麵」，過時過節開party，大家可以試吓吖。

5)一般蔥油拌麵傳統嘅做法，都係用上海麵。唔知大家知唔知上海麵有四種，最粗嗰種係好似369、一品香、大上海、香港老飯店嗰種上海粗炒size，煙靭又咬口；第二種是幼少少，呢種size做湯麵一流，好夾；第三種就係再幼啲就似angel hair，做煨麵好似青菜燴麵、嫩雞煨麵，腍腍地一流，我最like !第四種係扁身啲，比較似第三種，亦都好容易煮得腍，但係唔適合煨，放湯比較好。

6)至於上海雲吞皮，都有四種㗎，都係要去返粉麵店可以買到。我好熟路嘅，有幾間可以買到呢啲雲吞皮，以前荃灣嗰間民豐、大埔嘅英記，紅磡同元朗都各有一間呢種麵店，但我唔記得個名，呢幾間唔知我落船之後，仲會唔會喺度呢？

7)講返陶傑那篇文章，佢講嘅「蔥油拌麵」係喺大陸食嘅，兩蚊人民幣一碗，那店主廚娘問陶傑：「哪裏來？」，他說：「香港」。廚娘說：「香港好啊，有董建華。」(篇文章大概係老懵懂時代前後的作品吧。)陶傑說：「咁好，不如我哋交換啦，你俾100碗麵我，我比董建華你吖？！」哈哈哈，好L好笑囉。乜值$200人民幣咁多咩？孤獨的美食家喺船上諗，如果可以喺用10個比卡超換一碗雲吞麵就好了！

8)船上都有美食嘅，有一個星期四嘅中午，孤獨嘅美食家食到一mug 好味嘅眉豆粥，就咁一mug眉豆粥，本來冇乜特別，就好似星期二中午嘅黃豆粥一樣，不過加咗一樣嘢，完全令到眉豆粥提升到人間美食嘅層次，就係用人工買嘅零食——齋燒鵝，真係美味到爆炸。除咗食蘑菇煙肉意粉之外，大家都可以試吓整齋燒鵝眉豆粥試吓，正所謂同呼吸共命運，齊上齊落齊食粥！

9)齋燒鵝粥嘅做法，就係將啲齋燒鵝放喺淡茂茂嘅粥入面，浸佢幾十秒，甚至1分鐘左右，啲粥會染成少少橙色，齋燒鵝浸完之後軟硬度適中，好好味，粥帶點甜香，亦都令人開胃，可以食夠兩mug㖭喎！食住齋燒鵝，想着食真燒鵝。唔知而家邊間燒鵝好食呢？落船之後食返隻燒鵝髀先！

10)美食家覺得其實燒鵝應該配飯或瀨粉，粥嘅話，佢比較喜歡魚腩粥多些，要多薑絲嗰隻，特別係飲完酒隔日起身，食碗熱辣辣多薑絲嘅魚腩粥，立即醒晒！船上有啲同學，食粥嫌太寡，會將蝦條壓碎，加落淡茂茂嘅粥入面，其實有啲似味精粉咁，啲粥加咗蝦條粉，就會變得杰撻撻，孤獨的美食家唔鍾意啲粥太杰，所以冇做呢個食法。

11)除咗加料齋燒鵝粥之外，美食家遇上星期六嘅花生粥，亦都會將魷魚絲加喺粥入面，花生粥清淡健康，加咗魷魚絲之後，就變成了走豬皮的艇仔粥了！美食家喺岸上嘅時候偶然，只係偶然，先至會食艇仔粥，因為唔鍾意豬皮上面嗰啲毛。食豬手，都好怕豬皮上面好硬好短嘅毛；食雞翼，又唔鍾意雞皮上嘅毛；仲有水蜜桃皮上面嘅絨毛、士多啤梨上面嘅骨仔，美食家通通都唔鍾意，食鯪魚球，又好怕啲細骨會啃骨，因為細個嘅時候曾經食過鯪魚球啃骨，當時試過好多方法，但最啱用嘅，都係吞一口飯團。飯團對美食家而言，係父愛。記得細個有次扭計唔食飯，爸爸用手搓咗一口飯團，裏面包住一啲梅菜肉餅之類嘅肉碎，佢食完一嚿飯團又一嚿飯團，總共食咗七嚿。點解佢咁記得呢？要記得嘅嘢，佢會記得嘅。到最後，孤獨的美食家會記得孤獨多些，還是美食多些？記得仇恨多些，還是記得恩惠多些？未到最後，勝負難分。船上孤獨的美食家講飲講食，講到呢度。

12)過完聖誕，就快農曆新年，如果你仲未寫過信俾快必嘅話，唔好懶、唔好怕羞，買張靚靚嘅賀年卡，賀吓佢啦，寄埋俾慢必都好㗎 ！如果你好耐冇寫過信俾佢嘅話，就請快啲加入返筆友嘅行列，因為收到你哋嘅信，對佢嚟講係好大嘅支持同鼓勵，佢仲有15個月左右要捱呀！

~提醒一下，寫信、寄卡，記住唔可以有閃粉、唔可以有貼紙，唔可以用訂書釘，亦都唔可以係3D凸出嚟嗰種喎，但係燙金燙銀嗰一啲就OK嘅！

來信請寄去：
香港七姊妹郵政局
郵政信箱60141號
（PO Box 60141
Tsat Tsz Mui Post Office, HK）