Ауруханаға өз аяғымен барған 49 жастағы азамат бір жарым жылдан бері комада жатыр

Қызылорда қаласында ауруханаға өз аяғымен барған 49 жастағы азамат бір жарым жылдан бері комада жатыр. Ес-түссіз терең ұйқыдағы Ержан Әзенов ояна ма, жоқ па тіпті дәрігерлер де білмейді. Ал жақындары өкпесіне салқын тиіп барған науқасқа ақ халаттылар әу баста шұғыл көмек көрсетпеген дейді. Тіпті дерті асқынып тұрса да, ауруханадан шығарып жібергеніне ашынады. Қазір медицина мамандарының әрекетін полиция тексеріп жатыр.
Көзі ашық болса да, жарының дауысына селт етпеген бұл азаматтың есімі Ержан Әзенов. Тепсе темір үзетін жігіт ағасының аяқ асты комаға түскеніне бір жарым жылдан асыпты. Ал, жұбайы кенеттен есін жиып, үн қата ма деген үмітпен күнде ауруханаға келеді.
Қарлығаш Сақтапбергенова 2024 жылдың жазында жолдасым пневмонияға шалдығып, ауруханаға барды дейді. Алайда ыстық бөлмеде ауа жетпей қиналған азамат бір күннен кейін "үйден ем қабылдаймын" деп дәрігерден өзі сұранып шығыпты. Осылайша таксиге мінген бойда Ержан Әзеновтың бірнеше сәтке жүрегі соқпай, миы жұмысын тоқтатқан. Содан бері ес-түссіз күйде жатыр дейді жұбайы. Ал әйелі күйеуінің денсаулығын бірден тексеріп, тиісті ем жүргізбеген медицина мамандарын кінәлайды.
ҚАРЛЫҒАШ САҚТАПБЕРГЕНОВА, Қызылорда қаласының тұрғыны:
Ішкі құрылыстары бәрі істеп тұр. Миы тоқтап қалған, пока жүрегі 10-11 минут тоқтап тұрғанда. Емделемін деп аяғымен келген адам мынадай жағдайға ұшырады. Бүгін ровно 1 жыл 7 ай жатыр. Мына жаққа келгенде неге емі дұрыс жасалмады сол күні. Неге жасамады, ол адамды аман алып қалуға болатын еді ғой.
Ал аурухананың ақ халаттылары тиісті көмек көрсетілді деп ақталады.
ГҮЛСІМ БЕРЖАППАРОВА, Қызылорда облыстық көпбейінді ауруханасы бас дәрігерінің орынбасары:
Негізгі науқастың жалобтарына байланысты, сол кездегі тексеру нәтижесіне байланысты оған пневмония диагнозы қойылып, терапия бөліміне жатқызылып, пульмонолог дәрігермен қаралған. Стандартқа байланысты ем-шаралар тағайындалған. Ол жерде емде ауытқушылық болды деген нәрсеге негіз жоқ. Бір жарым жылдан бері бақылап отырмыз. Өзгеріс байқалып тұрған жоқ.
Аурухана басшылығы ауырып келген адамды үйіне жіберген дәрігерге сөгіс беріпті. Ал полицейлер "міндетін тиісінше орындамау" бабымен тергеу жүргізіп жатыр. Өмір бойы спортпен шұғылданған Ержан Әзенов бұған дейін денсаулығына шағым айтпаған дейді әйелі. Жігіт ағасының есін жиғанын екі қызы да асыға күтіп жүр.



#Информбюро #31арна #БастыЖаңалықтар #Новости #31канал