Үкімет 16 жасқа толмаған балалардың Инстаграм мен Тиктокқа кіруіне тыйым салуға шындап кірісті

Үкімет 16 жасқа толмаған балалардың Инстаграм мен Тиктокқа кіруіне тыйым салуға шындап кірісті. Бүгінде жеткіншектерді әлеуметтік желіден шектейтін заң сараптамадан өтіп, енді қоғамдық талқылауға шығарылмақ. Бұл туралы Мәдениет және ақпарат министрі Аида Балаева мәлімдеді. Тиісті заң күшіне енсе, бұдан былай жеткіншектердің әлеуметтік желілерге тіркеліп, аккаунтар ашуына жол берілмейді. Ал жасты қалай анықтайды? Бастамаға қатысты заң шығарушы депутаттар не дейді? Әріптесім Оразай Нұртайұлы жалғастырады.
ОРАЗАЙ НҰРТАЙҰЛЫ, тілші:
Елдегі балалар мен жасөспірімдерді қауіпті контенттен қорғауға ұмтылған үкімет жалпы әлеуметтік желіге тыйым салмақ. Енді 16 жастан аспағандарға әлеуметтік желіге кірігу, тіпті тіркелуге заңмен шектеу қою көзделіп отыр. Оған билік өкілдері білек сыбана кіріскен де сыңайлы. Ақпарат министрі Аида Балаеваның айтуынша, бүгінде қолданушылардың жасын анықтайтын жүйе құрастырылып жатыр.
АИДА БАЛАЕВА, ҚР мәдениет және ақпарат министрі:
Оқу-ағарту министрлігі және Жасанды интеллект және цифрлық даму министрлігімен бірлесіп, пайдаланушылардың жасын тексеру механизмдерін әзірлеу, қажет болса жауапкершілік шараларын қарастыру жоспарланып отыр.
Министр әзірге нақты қай әлеуметтік желіге тыйым салынатынын Үкімет отырысында ашып айтпады. Бірақ бұған дейін ведомство 16 жасқа толмағандарға арналған тыйым Whats App пен телеграм сынды хат алмасатын мессенджерлерге қолданылмайтынын хабарлаған. Бастаманы депутаттар қолдайды, бірақ тыйымды 16 жасқа дейінгілерге емес, одан жастау балаларға қолдану қажет дейді.
АЗАТ ПЕРУАШЕВ, ҚР Парламенті Мәжілісінің Депутаты:
16 жастағы балалар қазір өмірге қадам басқан адамдар. Сондықтан оларда да алдын ала біз осындай өмірге үйретуіміз керек. Соған оқытуымыз керек. Сондықтан меніңше 12 жастан болсын, 13 жастан болсын шектеуді алып тастауға болады. Оған дейін, әрине, шектеу болуы керек. Себебі, баланың санасы піскен емес. Әлі қалыптасқан емес.
Әлеуметтік желідегі тыйым іс жүзінде қалай болатыны әзірге белгісіз. Мәжіліс депутаттары Франция мен Испания, Норвегия сияқты елдердің тәжірибесін назарға алуды ұсынды.



#Информбюро #31арна #БастыЖаңалықтар #Новости #31канал