【

今日衞生panel其中一個議題講「公營醫療收費改革」。中國人有句說話「唔怕生壞命，最怕改壞名」，呢一次收費改革有唔少名詞同說法引起社會誤會同不滿。所以係會上，我就向局長分享咗2個意見。

1️⃣ 今次改革，藥費都有加💊。政府嘅說法係普通科「藥物每項$5，最多4星期」同專科「藥物每項$20，最多4星期」，就咁直覺睇，我諗嗰個都覺得係每星期就要拎一次藥，之後政府出嚟澄清話唔係，只係藥費計算單位。其實簡簡單單寫「每項藥物每4星期$5」同「每項藥物每4星期$20」咪得，似乎清楚好多。我一向最怕啲嘢出咗街，市民先入為主，一聽到係A，就永遠都會覺得係A，就算錯都唔理，所以改壞名係好大鑊，政府係咪要考慮吓改咗嗰用詞呢？今日立法會文件仲係用緊誤導性嘅說法！

🗣️ 局長就話好同意我所講，認為係解說方面係要再細緻啲，尤其係藥物費用方面。局長同高醫生喺唔同場合都已經透過媒體解說，希望市民明白佢哋所講嘅係藥物計算單位，並唔需要4個星期拎一次藥，有需要嘅市民依然可以一次過拎最多24個星期嘅藥。

2️⃣ 就住急症室收費🏥，地區又有啲市民同我講，話好明白「危殆」同「危急」都有個危字，免費係冇問題；但之後三類「緊急」、「次緊急」同「非緊急」，大家都有緊急兩隻字，但好明顯「非緊急」嘅病人去普通門診睇醫生就得，嗰度仲變平啲，點解急症室要招呼埋佢哋，仲要齊齊收$400呢？不如簡簡單單分三級，「危殆」、「危急」免費；「緊急」同「次緊急」收$300；「非緊急」收$500。

🗣️ 局長就話好同意大部份「非緊急」係唔需要去急症室就診，不過有啲市民未必分得清，或者有啲係貪方便，所以病人嚟到急症室會先做分流，「非緊急」嘅可以再因應情況自行選擇。而收費方面，局長就話整體要一致收費，如果分類後先確定收費，會好容易製造其他矛盾。

👉🏻 局長嘅解釋就話收費唔同會引起誤會，完全係由一個operation嘅角度去睇，但就冇理到消費者角度。而家聽到嘅人就覺得點解要一視同仁收$400，用得咁嘅名就應該要分三級收費。我明政府有自己嘅concern，但如果凡事用詞用好啲，其實呢啲矛盾同誤解就唔會發生喇，仲唔懸崖勒馬？！