【財政預算案撥款條例草案發言】

無可否認，香港面臨回歸之後其中一個最嚴峻嘅危機，亦係經濟轉型嘅關鍵時刻。當然我哋要諗盡方法壓縮低成效嘅經常性開支，其實更重要係投資未來，任何生意人或MBA課程都會講呢個概念。如果係暫時性面對難關，短期有風浪，就要勒緊褲頭忍一忍；如果係結構性出現問題，除咗節流，就要轉型，所以一隻手慳錢，另一隻手就要洗錢投資未來。

1️⃣ 先講講有咩地方可以慳到錢

首先係公務員薪酬，其實今日好多公司都係諗減薪，凍薪算係好溫和嘅處理。但有個增薪點制度，令凍薪都唔可以完全凍結薪酬開支增長。局長曾經話呢個制度唔係自動加薪，係要經過評核，睇返數字17萬公務員大概有10萬未到頂薪點，而舊年只有21人係過唔到評核，即係通過率係99.979%，好難怪外界覺得個評核係形同虛設。好高興局長認同個制度應該揸得更嚴，我自己做開管理就覺得通常7-8成合格率就算合理，我估計今年增薪大約70億，2成唔增薪，每年可以慳14億，希望下年會有啲比較合理嘅數字。

另一樣嘢我跟咗幾年，就係前特首辦月租40萬呢個豪華辦公室，可能有人會覺得以政府咁大盤數去睇唔算大數，我著眼點唔係個數大唔大，係用得值唔值。而家完咗約終於轉返去政府物業，但奇怪在呢個政府物業係已經計劃重建，即係幾年後又要搬，咁280萬裝修費咪倒咗落海？根本就應該搵個永久辦公室一勞永逸，所以我覺得政府應該檢討政策，只服務三個前特首，咁堅尼地道辦公室就可以解決所有問題。

另一個今年大家關注嘅係二元計劃。首先感謝政府接納我哋圓桌十元以上兩折呢個建議，正如我哋喺建議書講，呢個建議唔係話短期內可以慳幾多錢，係令呢個計劃合理化同埋可持續。而同時可以改善長車短搭，因為如果長車係比較貴，相信好多人都會精明咁揀。如果要真正慳到開支，應該大力打擊違規使用。港鐵800幾部閘機，點查都查唔晒。由屯門去金鐘成人票價係$29.3，有啲職業例如係需要跨區巡舖嘅工種、或者好多公司都會請嘅送件員同速遞員，如果有心非法使用乘車優惠，每個月真係可以慳成3、4千蚊，罰1千係冇牙老虎，所以我要求港鐵大幅調高罰款額，加到3、5千蚊就差唔多。至於小巴同巴士，政府只需要修例，賦予司機權力，規定佢要求持咭人拎張咭出嚟對樣，就可以有效杜絕非法使用樂悠咭嘅情況。可惜政府又唔願意咁做，我將會攞多啲關於檢控嘅數據去跟進。

嚟緊我哋好多大型基建，係為咗配合國策同香港未來發展，係一定要做，咁就要諗點可以有效咁做。眾所周知，香港工程成本高，其中一個原因係工資高，我希望政府研究一種新嘅輸入勞動力模式，呢啲勞工即日往返，唔喺香港過夜，唔享有任何現今外勞嘅其他福利，最重要嘅係，只適用於配合國策融入大灣區嘅公營基建項目，例如洪前鐵路、北環綫支線同北都公路。呢類勞工嘅工資就可以唔受香港中位數嘅限制，用返內地工資水平。呢個方法嘅好處係幫政府大幅減低開支，令我哋唔需要動用咁多儲備或者大量舉債，最終受惠都係香港市民同納稅人。

2️⃣ 講完應慳則慳，就講吓投資未來

香港需唔需要舉債，需要舉幾多債，就同政府最大嘅發展北都有關，而北都承載咁多人又唔少得鐵路，如果用公私營合作起鐵路，政府就需要舉多啲債。因為路政署會負責七成基建成本，港鐵只需要起其餘三成機電，不過咁做就會快好多又平好多，因為唔需要咁多部門審批。所以我建議用公私營合作發展模式起北都所有嘅新鐵路。如果唔係，靠港鐵發債只會無了期拖，佢成間公司市值只有1,700億，點發到咁多債，根本冇可能做到！而政府就有好多發債空間，財爺預告會去到國內生產總值，GDP嘅12-16%，但我哋國家都去到89%，美國121%，新加坡更去到175%。如果以我哋三萬億GDP計，就算去到40%，12,000億，都係全球偏低嘅。

另外，我係好贊成政府發展南大嶼，除咗個項目本身要做得好，酒店同交通配套都係關鍵。我建議起一條4線公路駁上去機場同港珠澳大橋，打造香港嘅大小梅沙，同大鵬灣競爭。深圳已經指定佢哋現有3間酒店加建到6間，全部走高端路線，點解我哋香港仲係咁落後？

我一直都話香港嘅旅遊同盛事基建不足，所以建議喺欣澳填海區起賽車場。好耐之前發展局嚟傾呢個填海區嘅時候，係冇話嗰度係要起車廠俾「洪港鐵路」，只係話要嚟做旅遊盛事基建，又因為呢度嘅發展限制，包括高度限制同受飛機噪音影響，我就建議做賽車場，得到汽車會同民間大力支持，希望係回歸之後繼迪士尼同啟德嘅第三大盛事基建。當時呢個係主菜，後來拖拖吓就變咗車廠係主菜，旅遊基建變咗配菜。我對呢個做法係好唔同意，希望政府盡快完成呢個填海嘅用途研究。

我一路都追緊交椅洲人工島嘅進度，唔係因為佢可以做到幾多地，而係因為嚟緊嘅北都大把地，如果冇咗條「洪港鐵路」，咁「洪前鐵路」就變咗斷截禾蟲。我喺特別財委會指出，之前北都「片區開發」嘅宣傳品都仲有呢條「洪港鐵路」，原文話「有三條鐵路滙聚，包括屯馬綫、港深西部鐵路、港島西至洪水橋鐵路，為本地及跨境運輸提供極佳的聯繫。」之後收到22份意向書。但係到3月31號嘅鐵路事宜小組會議，三條鐵路最重要、接連港島同洪水橋嗰部分竟然冇咗。嗰日局長唔夠時間回應兩個重點。第一，點解「片區開發」宣傳有一條咁嘅鐵路，去到後來就成條冇咗，背後到底發生咩事呢？第二，喺2034 年後有成千幾萬嘅深圳居民大量湧到，到時我哋點處理？條跨境鐵路過到嚟都承載唔到，希望政府清楚交代到時點接待我哋嘅同胞。

3️⃣ 最後就講講「應洗則洗」，對市場、民生都有利嘅建議

首先，我建議政府宣布停止賣地係應該包埋住宅用地，穩定樓市對香港係非常重要。但政府似乎認為樓市已經止跌，我就唔係太樂觀。

另外有個問題我好有意見，就係元朗嘅鄉郊污水渠。十八鄉、屏山、廈村、八鄉、錦田同新田合稱「六鄉」，目前已經起好咗好多主幹渠，但係仲有好多支渠未入村。政府起條渠唔入村，咁村民就繼續用化糞池，搞到又臭、衞生又差，咁仲話香港係國際大都會？我喺較早前同元朗區議會見過面，佢哋好直接咁同成個立法會講：「立法會有乜用？每屆叫我哋嚟一次講嘢，但就奉旨解決唔到！」。我就臉皮最薄，唔衰得，更加唔想俾人鬧！所以聯繫政府部門同佢哋坐低開咗個大會，六條鄉最少總共有成百條俗稱「魚骨」嘅支渠，有32條已經立咗項，大約只需要18億。我即時問政府拎時間表，但佢哋就即刻面阻阻、冇嘢講。咁好明顯就係「水不到，渠不成」，即係上頭唔肯放水啦！經過今次會議，仲帶出咗政府俾市民一個貪新忘舊嘅形象。如果係舊嘢，立咗項嘅嘢政府都係會一路拖，有新嘅項目就做咗先，永無止境，我諗呢個都唔係政府想俾人嘅形象~

至於預算案宣佈全面檢討隧道費，我哋圓桌對隧道收費嘅立場係「用者自付，收回營運包括折舊成本，不可倒賺」，所以好希望政府將來會行呢條路線。如果唔係，政府嘅隧道收費政策只會係七國咁亂、毫無貫徹理念。