你可能不知道的沙頭角支綫故事！點解只得16年命運？ 面對咩原因要全線關閉？

你可能不知道的沙頭角支綫故事！點解只得16年命運？ 面對咩原因要全線關閉？

【我們的城市。我們的故事】
逢周六更新

特首林鄭月娥喺佢今屆任期最後一份施政報告裡面，建議喺港鐵東鐵綫粉嶺站，興建一條鐵路支線，經過皇后山、打鼓嶺、香園圍、文錦渡，然後喺羅湖南伸延到古洞，形成一條北環綫。呢個計劃最終係咪能夠成功落實，固然有待時間見證。不過呢條計劃中嘅鐵路走線，就令到一班老一輩嘅新界居民，諗起只係營運咗16年，就被公路取代嘅九鐵沙頭角支綫。

沙頭角支綫喺1911年4月開始興建，採用單軌設計。支綫起點位於粉嶺站，沿途喺洪嶺、禾坑、石涌凹設有分站，終點站就設置喺沙頭角。由於當年沿線仲未興建任何道路，所以興建呢條鐵路嘅所有材料，都要依賴牛車以及人力運送。經過為時八個月嘅興建時間，介乎粉嶺至石涌凹嘅一段列車服務，喺1911年12月，就已經開始行走。到咗1912年4月1號，沙頭角支綫就宣告全線通車。

由於呢條鐵路支線嘅設計，係希望乘客可以喺粉嶺站，轉搭列車出市區。所以呢條支線嘅列車開出時間同埋班次，都會因應當年九廣鐵路粉嶺站嘅列車服務時間表去制定。除咗載客之外，沙頭角支線亦曾經提供貨運列車服務。不過喺1924年，政府決定興建沙頭角公路之後，沙頭角支線嘅命運，隨即響起警號。當沙頭角公路喺1927年正式通車之後，沙頭角支線嘅客量隨即急跌。最終政府決定喺1928年4月1號，將沙頭角支線關閉，結束短短16年嘅營運歷史。

雖然沙頭角支線已經停運多年，不過洪嶺站嘅車站建築，今時今日仍然坐落喺近坪輋路嘅一段沙頭角公路。而其中一部曾經用嚟行走沙頭角支線嘅蒸氣機車，經過九廣鐵路公司喺上世紀九十年代進行修復之後，而家已經成為大埔鐵路博物館裡面嘅其中一件靜態展品。

撰文：Dennis Law