Еңбекақымыз мардымсыз! Алматыда «Қазақтелеком» жұмысшылары наразылыққа шықты

Бүгін "Қазақтелеком" компаниясының Алматыдағы 200-ге жуық қызметкері жұмысқа шығудан бас тартты. Жылдар бойы мардымсыз жалақыға еңбек етіп, шыдамымыз таусылды деген азаматтар айлықтарын 100 пайызға көтеруді талап етеді. Ал компания басшылығы "Самұрық-Қазына" қорында екі аптадан кейін өтетін жиында жалақы мәселесін көтереміз деп отыр.
60 мың теңге айлығын қалай үнемдесе де жеткізе алмайтын "Қазақтелекомның" кейбір қызметкерлері төзіміміз осымен таусылды дейді. Жарытып жалақы алмайтындардың басым бөлігі таңғы бестен тұрып, облыстан қалаға жұмысқа келетін- монтер, кабель дәнекерлеушілері екен. Қара суықта қара жұмыс істейтіндер басшылық бізді балаша алдауға көшкен деп ашулы.
Ал басшылық, жұмысшылар алып отырған жалақыларын дұрыс есептеп тұрған жоқ деді. Айлық 20 пайызға өсті, ал айлық сыйақы жалақының 15 пайызын құрайды деген компания директоры бұл мәселені "Қазақтелеком" басқармасының басшылығы Директорлар Кеңесіне жеткізетінін айтты. Яғни, Самұрық-Қазына әл-ауқат қоры қарастырады.
ШЕРХАН РАЗДЫҚОВ, «АЛМАТЫТЕЛЕКОМ» ӨТД БАС ДИРЕКТОРЫ:
– Басқарма 11-ші ақпан күні Директорлар кеңесінің мәжілісі болады, соған айлық мәселесімен ұсыныспен шығайын деп отыр.
Былтыр мысалы осы "Алматытелеком" компаниясында орташа айлық 20 пайызға өссе, биыл мен ойламын Құдай қаласа одан кем болмайды өсу.
Қалтамызға қанша ақша түсетінін тиынына дейін жақсы білеміз қызметкерлер, компания бір адамға екі кісінің жұмысын артып, бір жалақыны төлеуді де доғарсын деген уәж айтты.
Ал 11-ші ақпаннан кейін айлық мәселесі шешілмесе, «Қазақтелеком» компаниясының қызметкерлері түгел жұмысқа шықпаймыз деп отыр.
Әйгерім Ердәулет, Влад Шишко




Бізді әлеуметтік желіде оқыңыздар:
Youtube -   / @informburo31kanal  
Facebook -   / informburo31  
Instagram -   / informburo31  
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#наразылық #Қазақтелеком #Алматы