ማርያም ሲባል ቅር የሚልህ ወንድሜ ኢየሱስ አፉን የፈታው ማርያም እያለ መሆኑን ላስታውስህ እወዳለሁ

ማርያም ሲባል ቅር የሚልህ ወንድሜ ኢየሱስ አፉን የፈታው ማርያም እያለ መሆኑን ላስታውስህ እወዳለሁ:: መቼም ለዚህም ጥቅስ እንደማትጠይቀኝ ተስፋ አደርጋለሁ::
ኢየሱስ ሲባል ቅር የሚልሽ እኅቴ ማርያም ከሰማይ ሰምታ ለልጅዋ ያወጣችው ስም ኢየሱስ እንደሆነ ላስታውስህ እወዳለሁ::
በእርግጥ ድንግል ማርያም ኢየሱስ ብላ ብትሰይመውም ስሙን ግን ለመጥራት ግን አንድ ቃል አልበቃት ብሎ ተቸግራ ነበር::
ገና በሆድዋ ውስጥ እያለ ወደ እርሱ ስትጸልይ "ነፍሴ ጌታን ታከብረዋለች:: መንፈሴም በአምላኬና በመድኃኒቴ ሐሴት ታደርጋለች" ስትል ሰማናት:: ልጅዋ ከሆድዋ ሳይወጣ ከልጅዋ ጋር ንግግር የጀመረች እናት እንዴት ያለች ናት? ወደ ሆድዋ ራስዋን ዘንበል አድርጋ "ጌታዬ አምላኬ መድኃኒቴ" እያለች የምትጣራ እናት አይታችሁ ታውቁ ይሆን? በሆድዋ ውስጥ ዙፋኑን ለዘረጋው ንጉሥ ጸሎት የምታሰማ እናት እንደምን ያለች ናት?
ከወለደችው በኋላስ ማን ብላ ጠርታው ይሆን? ገና ሕፃን ሳለ ምን ብላ አቅፋ አስተኛችው ይሆን? ምን ብላስ መገበችው?
የልደት መዝሙሩን "እሹሩሩ" (lullaby) ብሎ የሰየመው ቅዱስ ኤፍሬም ድንግል ማርያም ልጅዋን ምን እያለች ታስተኛው ይሆን? ብሎ በእርስዋ ቦታ ይጨነቃል:: በእርስዋ አንደበት ሆኖ እንዲህ ሲል ወደ ልጅዋ ይዘምራል::
" አንተ ምንጭ ሆይ ለአንተ ለማጠጣት የጡቶችን
ምንጭ እንዴት ልከፍታቸው ይቻለኛል? ሁሉን
ከገበታህ የምትመግብ ሆይ እኔ አንተን ልመግብህ
እንዴት ይቻለኛል? የክብርን ነጸብራቅ የተጎናፀፍከው
ሆይ እንደምን በጨርቅ ልጠቀልልህ እችላለሁ?"
ለአንተ እንዴት ያለ የማባበል ዜማን ላዜምልህ
እችላለሁ? እንደማንኛውም ሕፃን ለአንተ እሹሩሩ ብዬ
እንዳልዘምርልህ እንደ ማንኛውም ሰው ተራ ልደትን
የተወለድህ አይደለህም፡፡ ፅንሰትህ አዲስ ነው ፤
ልደትህም ተአምር ነው፡፡ በመንፈስ ካልሆነ ለአንተ
ሊዘምር የሚችል ማን ነው?’
ድንግል ማርያም ሆድዋ ውስጥ ሳለ አምላኬ መድኃኒቴ ያለችው ልጅዋን ካደገ በኋላ ምን ብላ ጠርታው ይሆን ብዬ በዐሥራ ሁለት ዓመቱ በቤተ መቅደስ እስክታገኘው ጠብቄ ተከትያት ገባሁ:: ከአይሁድ መምህራን ሥር ቁጭ ብሎ በንግግሩ ያስደንቃቸዋል:: (ሉቃ. 2:48)
ምን ብላ ትጠራው ይሆን ብዬ አንደበትዋን ስጠባበቅ
"ልጄ ሆይ" አለችው:: እኛ አባታችን ሆይ የምንለውን ፈጣሪ ልጄ ሆይ አለችው::
ድንግል ማርያም ለልጅዋ የሚበቃው ስም አጥታለት ነበርና እርሱን የምትጠራበት ብዙ ስም ነበራት:: በእናቶቻችን "ማን ብዬ ልጥራው ስምህን" ዜማ ድንግሊቱ ተጨንቃለች::
"ማን ብዬ ብጠራህ ይሻለኛል? ልጄ ብዬ ልጥራህ? ወንድሜ ልበልህ? ሙሽራዬስ ብዬ ልጥራህ? ጌታዬስ ልበልህ? ከዳዊት ቤት እንደመሆኔ እኅትህ ነኝ፡፡ ስለፀነስሁህ እናትህ ነኝ ፤ ስለ ንጽሕናህ ሙሽራህ ነኝ ፤ መድኃኒቴ ነህና ባሪያህና ልጅህ ነኝ’
አምላኬ ጌታዬ መድኃኒቴ ልጄ!
(St. Ephrem The Syrian, Harp of Spirit)
ማርያምና ኢየሱስ የሚሉት ስሞች ወንጌላውያን ሁለት ጎራ ይዘው የተጣሉባቸው ሳይሆኑ በምናከብረው ወንጌል ላይ አብረው የተጻፉ ስሞች ናቸው::ኢየሱስ የሚለው ስም ከድንግል ማርያም አፍ በፍቅር የሚፈስስ ጥዑም ስም ነበረ:: ማርያም የሚለው ስም ደግሞ ኢየሱስ ከሰው ልጆች ሁሉ በላይ በእናት ፍቅር ሆኖ የጠራው ጥዑም ስም ነው::
የልጅዋ ስም ሲጠራ የምታዝን ማርያም የእናቱ ስም ሲጠራ የሚናደድ ኢየሱስም የለም::
ዲያቆን ሄኖክ ኃይሌ
ኅዳር ጽዮን 2018 ዓ.ም.