យើងគួរបង់១ពាន់លានដុល្លារជាមួយអាមេរិក ឬ អត់ ? Board of peace|22មករា2026|BoSokunthea

លោក ដូណាល់ ត្រាំ ផ្ញើលិខិតជូនសម្តេចធិបតី ហ៊ុន ម៉ាណែត អញ្ជើញកម្ពុជាចូលរួមជាសមាជិកស្ថាបនិកនៃ “ក្រុមប្រឹក្សាសន្តិភាព” និងជាភាគីនៃធម្មនុញ្ញរបស់ក្រុមប្រឹក្សានេះ
ភ្នំពេញ — នៅយប់ថ្ងៃពុធនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបង្ហោះនៅលើទំព័រហ្វេសប៊ុកផ្លូវការរបស់សម្តេចថា សម្តេចទទួលបានលិខិតផ្លូវការពីលោក ដូណាល់ ត្រាំ (Donald J. Trump) ប្រធានាធិបតីសហរដ្ឋអាមេរិក ដែលបានអញ្ជើញកម្ពុជាឱ្យចូលរួមជាសមាជិកស្ថាបនិកនៃ “ក្រុមប្រឹក្សាសន្តិភាព” (Board of Peace)។
យោងតាមលិខិតរបស់សេតវិមាន ចុះថ្ងៃទី១៦ ខែមករា ឆ្នាំ២០២៦ លោកប្រធានាធិបតី ត្រាំ បានស្នើឱ្យកម្ពុជាក្លាយជា “រដ្ឋសមាជិកស្ថាបនិក” នៃអង្គភាពអន្តរជាតិថ្មីមួយនេះ ដែលនឹងត្រូវបង្កើតឡើងក្រោមរដ្ឋបាលគ្រប់គ្រងអន្តរកាល ដើម្បីដោះស្រាយជម្លោះ និងកសាងសន្តិភាពពិភពលោក។
ខ្លឹមសារក្នុងលិខិតបានបញ្ជាក់ថា គំនិតផ្តួចផ្តើមនេះគឺជាផ្នែកមួយនៃ “ផែនការគ្រប់ជ្រុងជ្រោយដើម្បីបញ្ចប់ជម្លោះនៅហ្គាហ្សា” ដែលត្រូវបានប្រកាសកាលពីខែកញ្ញា ឆ្នាំ២០២៥ និងត្រូវបានគាំទ្រដោយសេចក្តីសម្រេចចិត្តលេខ ២៨០៣ របស់ក្រុមប្រឹក្សាសន្តិសុខអង្គការសហប្រជាជាតិ។ ក្រុមប្រឹក្សាសន្តិភាពនេះ ត្រូវបានបង្កើតឡើងក្នុងគោលបំណងប្រមូលផ្តុំមេដឹកនាំពិភពលោកឱ្យមកចូលរួមទទួលខុសត្រូវរួមគ្នា ក្នុងការធានាឱ្យបាននូវស្ថិរភាពសកលប្រកបដោយនិរន្តរភាព។
លោកប្រធានាធិបតី ត្រាំ ក៏បានអញ្ជើញកម្ពុជាឱ្យធ្វើជាភាគីនៃ ធម្មនុញ្ញរបស់ក្រុមប្រឹក្សាសន្តិភាព តាមរយៈការចុះហត្ថលេខា និងផ្តល់សច្ចាប័នលើឯកសារច្បាប់ដែលបានភ្ជាប់មកជាមួយលិខិតអញ្ជើញនោះ។
ជាការឆ្លើយតប សម្តេចមហាបវរធិបតី ហ៊ុន ម៉ាណែត បានសម្តែងនូវការទទួលស្គាល់ចំពោះការអញ្ជើញនេះ ប៉ុន្តែពុំទាន់មានការបញ្ជាក់ជាផ្លូវការថា កម្ពុជាព្រមចូលតាមសំណើនេះឬយ៉ាងណាឡើយ។
សារព័ត៌មាន The Khmer Today នឹងបន្តតាមដាន និងរាយការណ៍ជូនបងប្អូនបន្ថែមទៀត នៅពេលដែលយើងទទួលបានព័ត៌មានថ្មីៗពាក់ព័ន្ធនឹងរឿងរ៉ាវមួយនេះ៕
ពីសារព័ត៌មាន The Khmer Today