ШЕРАЛӢ АБУЛҚАЙСОВ ДАРГУЗАШТ! Талафот дар санъати тоҷик

Бино ба иттилои саҳифаи Фейсбукии Театри ба номи Лоҳутӣ яке аз ҳунармандони босалиқаи театру кинои тоҷик Шералӣ Абулқайсов бинобар бемори коронавирус даргузашт.

Ҳунарпешаи халқии Тоҷикистон Шералӣ Абулқайсов дар Бемористони Қаряи Боло бистарӣ шуда, дар шӯъбаи эҳё қарор дошт. Дар мавриди бемории ҳунарманд актёр Некқадам Шоҳназаров ва журналист Далери Имомалӣ хабар дода буданд.

Шералӣ Абулқайсов 15 апрели соли 1951 дар деҳаи Дер зуди ноҳияи Рӯшони Вилояти мухтори кӯҳистони Бадахшон дар оилаи хизматчӣ тавваллуд шудааст. Соли 1968 баъди хатми мактаби миёнаи № 8 деҳаи Дер зуд ба Донишкадаи педагогии ба номи Т. Шевченко ба факултаи санъат ба шӯъбаи актёри театри драмма ва кино дохил шуда, соли 1973 онро бо мувафақкият хатм кардааст ва бо роҳхати Вазорати маданияти ҶШС Тоҷикистон ба Театри давлатии академии драмавии ба номи Абдулқосим Лоҳутӣ ба кор рафта, то имрӯз дар кори театру синамо нақш дошт.

Аз соли 1996 Омӯзгори Донишкадаи давлатии санъати ва фарҳанги Тоҷикистон ба номи М. Турсунзода буда, аз соли 2009 дотсент, вазифаи мудири кафедраи маҳорати актёриро ба ӯҳда дошт.
Шогирдонаш дар кумитаи телевизион ва радиои ҶТ, театри Лоҳутӣ, теари Аҳорун кор карда истодаанд. Дар матбуот гоҳ-гоҳ мақолаҳои мубоҳисавӣ — тадқиқотиаш ҷоп мешуданд. Аз ҷумла, «Ба оянда тӯр меандозем», «Чеҳраи боофарин», «Зинаҳои камолот», «Театрҳои халқиро ҷонибдорӣ бояд кард», «Талоши ҳастӣ» «Ҷавҳари ранги обӣ» ва ғайра.

Аҳли эҷоди Pressa.tj ба пайвандон ва аҳли хонаводаи марҳум изҳори тасаллият мекунанд.