PODCAST ALOLA IHA AMBITU SELEBRASAUN SEMANA MUNDIAL NO FULAN NASIONAL FÓ-SUSUBEEN INAN BA BEBÉ

“PRIORITIZA FO SUSUBEEN INAN KRIA SISTEMA APOIU SUSTENTAVEL”.

(Alolamedia) Kada tinan selebrasaun Semana Mundial Fo-susu ba Bebé globalmente hala’o husi 1-7 fulan agostu atu hodi promove, proteje no suporta fó susubeen inan ba bebé. Timor-Leste rasik hahú selebrasaun Semanal Mundial Fó-Susubeen Inan iha tinan 2005 bainhira Timor-Leste sai membru ba Rede International ba Iha Asaun Fo-hahan ba Bebe nian (IBFAN). Ministériu Saude (MS) mós deside fulan Agustu hanesan fulan nasionál ba promove, proteje no suporta fó-susubeen inan ba bebé. Ba tinan 2025 selebrasaun ne'e organiza ho tema nasionál “Prioritiza Fó-Susubeen Inan Kria Sistema Apoiu Sustentavel”.

“Tanba ne’e hakarak hato’o parabéns ba inan sira hotu ne’ebé maka fó-susu ba bebé sira, ita boot sira tau ona importánsia ba iha fó-susubeen inan ba bebé hodi fó-susu ba bebé, ida ne’e pasu ida ne’ebé di'ak tebes ba saúde bebé ninian”, lia-menon ida husi Diretora Ezekutiva Fundasaun Alola, Maria Guterres.

Tuir rekomendasaun Organizasaun Mundial ba Saude (OMS) no mós Ministeriu dé Saude rekomenda katak inan sira tenke fó susubeen inan eskluzivu ba bebé durante fulan 6 primeiru husi bebé moris atu nune’e bele salva bebé husi moras oioin. Susubeen inan ne’e, la'ós de'it hanesan ai-han di'ak liu ba kosok-oan sira durante fulan 6 dahuluk no apoia bebé nia dezenvolvimentu fíziku no mentál (kakutak nian). Benefisiu seluk, susubeen inan nian fasil atu prepara no bele fó protesaun ba bebé hasoru moras oioin inklui malnutrisaun.

“Hau apela mós ba inan isin rua sira atu kontinua tau lia-menon ida ne'e atu hanoin bainhira bebé moris mai tenke fó kedas inan nian susubeen ba bebé , la bele fó hahán ka hemu seluk ba bebé tanba ida ne’e perigozu ba bebé nia saúde”, apela Maria Guterres, Diretora Ezekutiva Fundasaun Alola.

Fundasaun Alola hanesan organizasaun sosiedade sivíl ida prepara atividade oin-oin hodi selebra Semanal espesiál ne’e. Eventu sira ne’e la'ós de'it sai momentu furak ida hodi fó apresiasaun aas ba inan sira ne'ebé iha koragem maka'as atu nafatin fo-susubeen inan ba bebé to'o fulan neen no kontinua ba to'o tinan rua maibé sai hanesan sasukat ida ba implementasaun programa Saude Inan no Oan iha komunidade. Kolabora hamutuk ho liña serbisu Ministeriu Saude no envolve membru grupu Saude Inan no Oan (SHIO), ekipa Alola organiza atividade oin-oin mak hanesan Konkursu Bebe Isin Diak, no mós atividade seluk iha suku tarjetu sira inklui mós podcast edisaun espesiál ne’e.

Ami orgullu tebes fahe edisaun espesiál PodCast Alola ida-ne'e ba kolega sira hotu hodi rona esperiensia furak ida husi ekipa Alola ne’ebe koloka iha Breastfeeding Café HNGV durante fo akonsellamentu ba inan sira ne’ebe hetan dezafius wainhira fó susubeen ba bebe. Modera husi Diretora Ezekutiva Fundasaun Alola, Sra. Maria Guterres, PodCast Alola edisaun espesial ne’e sei esplora inan Amelia nia esperiénsia pesoál durante fó-susu ba bebé sira. Mai ita hotu asisti edisaun espesial husi PodCast Alola ne’e!

#podcast #timorleste #dilipodcast #Alolapodcast #alolamedia #igualdade #SemanaMundialDeLaLactanciaMaterna #fosusubeeninan #sentrusaude #ronaaminiaistoria #breastfeedingcafe #HNGV #saudeinannooan #WBW2025 #munisipiuDili #Aileu #TimorLestenews