6. Plazhi në Sarandë

6.Plazhi në Sarandë tek nëndetësja dhe moli
Ndërsa ndjek rrugën “Mitat Hoxha” për në veriperëndim të Sarandës, merr majtas tek një rrugicë që të çon tek ‘Nëndetësja’, një emër plazhi dhe restoranti. Një mol i gjerë dhe i zgjatur drejt thellësisë është një vend ideal për të hedhur grepin. Gjatë stinës së pushimeve nuk mund të peshkosh gjatë ditës për shkak të pranisë së pushuesve por në mëngjes herët dhe në mbrëmje janë momente që mund të të sjellin fat.
Kjo nuk është një pikë e izoluar peshkimi. Ngjitur me të është një mol varkash dhe skafesh ku amatorët e peshkimit rreshtohen çdo pasdite gjatë muajve të vjeshtës e dimrit.
Edhe nëse jeni në Sarandë për dy ditë, ju mund ta ndani disa orë për peshkim. Mund të kapni ndo një levrek edhe 1 kg, ndërsa aty lëvrin edhe koca, por edhe oktapodi nëse nuk përton të zhytesh në ujin e freskët të vjeshtës.
Përgjatë qëndrimit në Sarandë mund të eksploroni qendrën arkeologjike, gjurmët e një sinagoge qindra vite më herët dhe natyrisht të përdorni varkat e shumta për të bërë një shëtitje brigjeve të paprekura dhe plazheve të izoluara në të dy anët e qytetit për nga plazhi i pulëbardhave apo nga veri për te Gjiri i Kakomesë.
Kuxhina në qytet është një miks perfekt mes tradicionales, mish dhe peshk, asaj italiane dhe greke, ndërsa përgjatë pedonales do të shijoni finger foods ose street foods me mundësi të gjerë zgjedhjeje.