Gosos di Santa Lucia Vergine e Martire compatrona di Nurachi

13 dicembre 2019
SANTA LUCIA VERGINE E MARTIRE


| Valorosa capitana
| contra sa idolatria
| Prega pro nois Lughia
| Martire Siracusana

1) Sa mamma Eutichia li desit,
In Siracusa sa vida,
E de su Chelu arrichida
Cun tanta grazia istesit,
Chi sa terra la miresit
Pro celeste non umana.
| Prega pro nois Lughia Martire Siracusana

2) Sa mamma chi l'addotrinat
In sos dogmas cristianos,
Pustis pro fines mundanos
Unu sposu li destinat,
Ma Lughia non declinat,
A fattu e pompa mundana.
| Prega pro nois Lughia Martire Siracusana

3) Sambene irrimediabile
Patiat sa trista mamma,
E cun s'orazione e brama
De una fizza tant'amabile,
Cudda de su tottu incurabile
Restat de su tottu sana.
| Prega pro nois Lughia Martire Siracusana

4) E cun modos mai bistos
De su patrimoniu ch'apesit
Tottu lu distribuesit
A sos poveros de Cristos,
Lassende tottus provvistos
De cantu necessitana.
| Prega pro nois Lughia Martire Siracusana

5) E cun sas gherras in pè
Chi Pascasiu Presidente,
Cumandat chi prontamente
Si risolvat inter sè
O rinunziare a sa lee
O a una morta inumana.
| Prega pro nois Lughia Martire Siracusana

6) E piùs chi non cheret dare
Incensu a sos deos tuos
Medas omines e giuos
Cumandat pro la tirare,
A logu de la violare
S'integresa sovraumana.
| Prega pro nois Lughia Martire Siracusana

7) O prodigios e portentos
De su Bratzu Onnipotente,
La tiran gente e piùs gente
E boes chentos e chentos
Ma inie a sos assentos
Potida mover non l'hana.
| Prega pro nois Lughia Martire Siracusana

8) A circulu un grande fogu
Le faghen pro esser brusada,
Ma s'insoro macchinada
Pro Lughia est disaogu,
Mentr'est sa Santa in su logu
Brusat sa gente pagana.
| Prega pro nois Lughia Martire Siracusana

9) Cumandat a la scannare
S'iniquu crudele Pascasiu
Però riflettet cun asiu
Su chi nd'hat a accabare
Cittadu est pro l'isterrare
Dae sa corte romana.
|Prega pro nois Lughia Martire Siracusana

10) S'Anima Santa bolesit
Cun trofeos a cuss'altura,
E Pascasiu in derettura
A s'inferru isprofundesit
E sa calma nde sighesit
De sa fide cristiana.
| Prega pro nois Lughia Martire Siracusana

11) Invincibile eroina
Isposa de s'Onnipotente
Mentras chi a su presente
Ses in su Chelu reina
Ses tue lughe divina
A sa zeghedade umana.
| Prega pro nois Lughia Martire Siracusana

| Valorosa capitana
| Contra sa idolatria
| Prega pro nois Lughia
| Martire Siracusana