علاج خلع مفصل الكتف المتكرر بدون جراحة

حالة بتحصل لما مفصل الكتف يتخلع من مكانه ورأس عظمة العضد ما تبقاش متثبتة في مكانها الطبيعي جوا الحق بتاعها، وتبدأ العظمة تخرج من التجويف، سواء بشكل كامل أو جزئي

أسباب خلع الكتف المتكرر

١- أكتر سبب شائع هو إصابة اسمها Bankart Lesion، ودي بتكون قطع في الغضروف اللي حوالين المفصل واللي وظيفته إنه يثبّت رأس عظمة العضد جوّه التجويف بتاعها

٢- السبب التاني هو Hill-Sachs Lesion، وديه إصابة بتحصل لما عظمة العضد تتأثر نتيجة احتكاكها المتكرر بالحافة الأمامية للتجويف الحقي وقت الخلع. وبتكون النتيجة إنه بيحصل فقدان للجزء العلوي و الخلفي من رأس عظمة العضد، وده بيخلي المفصل يفقد جزء من ثباته الطبيعي

٣- في ناس عندهم مرونة زايدة في الأربطة – سواء طبيعية أو ناتجة عن إصابات سابقة – وده بيخلي المفصل مايثبّتش كويس.

٤- بعض الناس عندهم عيوب تشريحية، زي تجويف ضحل أو ميلان بيغير شكل العظمة، وده بيخلي الكتف عرضة للخلع حتى بدون إصابة قوية.

أكتر ناس عرضة للخلع المتكرر؟
1_الرياضيين اللي بيلعبوا ألعاب عنيفة فيها تلامس contact sports، زي المصارعة أو كرة اليد. او العاب القوة

2_شباب تحت ٢٠ سنة، عشان الأربطة بتكون لسه مرنة وسهلة تتمزق.

3_كبار السن بعد الخلع ممكن يحصل لهم قطع في الأوتار بدل الغضروف خاصة لو سن المريض فوق ال ٤٠ سنه .

اعراض خلع مفصل الكتف.

أول حاجة: ألم شديد، خصوصًا في أول مرة وعدم القدرة علي تحريك المفصل تماما بعد كده يبدأ يظهر شعور بعدم الاستقرار… كأن الكتف هيفلت او هيخرج من مكانه لما ترفع دراعك أو تحركه حركة معينة. زي انه يلف الدرع لبره

تاني حاجة: ممكن تسمع صوت طقطقة أو فرقعة قوية مصحوبة بالم شديد مع الحركة.

تالت حاجة : العضلات تضعف، وتبدأ تحس إنك مش قادر ترفع حاجة تقيلة، أو حتى تلبس هدومك بسهولة. لانك بتحس ان المفصل هيتخلع من مكانه.

خامس حاجة: ممكن في بعض الحالات، الكتف شكله يتغير بسبب الخلع.

طرق تشخيص الخلع المتكرر للكتف.

١- يفحص الطبيب سريري بواسطة اختبار Apprehension: بيرفع دراعك بشكل معين ويشوف رد المريض لو حس بخوف أو ألم، يبقى فيه شك في عدم الاستقرار، وغيرها من الفحوصات السريرية.

2_ أشعة X-ray: علشان يشوف لو فيه كسر.

3_ رنين مغناطيسي (MRI): ده مهم جدًا عشان يوضح الغضاريف والأوتار.

4_ الاشعة المقطعية (CT) دي بنعملها لو شاكين في فقدان بالعظام عشان نحدد النسبة بدقة و اللي علي أساسه بنحدد نوع العلاج الصحيح للمريض

طرق علاج الخلع المتكرر لمفصل الكتف
يوجد العلاج تحفظي والعلاج بواسطة المنظار والتدخل الجراحي المحدود

العلاج التحفظي.
ده بنستخدمه في حالات قليلة جدا ، أو مع الناس اللي مش مؤهلين للجراحة.
وده بيشمل
1_ علاج طبيعي لتقوية عضلات الكتف، خصوصًا العضلات الدوارة
2_تمارين باستخدام الأربطة المطاطية
3_دعامات طبية تمنع الحركات اللي ممكن تخلع المفصل
4_ مسكنات لو فيه ألم أو التهاب.
لكن لازم تبقي عارف ان العلاج التحفظي لوحده مش كفاية في حالات الخلع المتكرر… خصوصًا لو فيه قطع في الغضروف أو فقدان في العظم ساعتها بننتقل للعلاج الجراحي.

اصلاح الخلع المتكرر للكتف هنا بيكون ضروري لإصلاح الضرر الأساسي اللي بيخلّي المفصل غير مستقر
نوع العملية التي يحتاجها المريض بيتحدد على حسب نوع الإصابة وحجمها، وتشخيصها الدقيق هو اللي بيحدد الإجراء الأنسب لضمان عدم تكرار الخلع مرة تانية.

ماهي اشهر العمليات الجراحية

اول عملية معانا هي Bankart Repair
دي عملية بالمنظار بيتم فيها خياطة الغضروف اللي اتقطع في اول خلع بخطاطيف خاصة عشان نثبت الغضروف والمفصل يرجع لحالته الطبيعية. واهم حاجة في المعلية ده هي اننا نعمل تثبيت الغضروف في الأماكن الصحيحة بتاعته وان العضم يكون اتحضر كويس جدا عشان نضمن اعلي نسبة إلتآم للغضروف و بالتالي
والعملية دي بتكون مناسبة جدًا لما يكون مفيش فقدان كبير في العظام. او نسبة العظم المفقود اقل من ٢٠ ٪

تاني عملية هي جراحة لاتارجي (Laterjet Procedure)
دي بنلجأ لها لو فيه فقدان في عظمة التجويف بنسبة كبيرة. اكبر من ٢٠ ٪ وهنا نحتاج نقل عظمة تانية اللي هي (النتوء الغرابي) ونعمل بيها تدعيم للحق ونثبّتها مكان الفقد، علشان نوسّع التجويف ونمنع الخلع تمامًا عن طريق اننا كبرنا المساحة اللي بتتحرك علها راس عظمة العضد .

ما بعد عملية الاصلاح الخلع المتكرر بالكتف.
التعافي بيعدّي على ٣ مراحل رئيسية:
المرحلة الأولى (أول 6 أسابيع): استخدام جبيرة لتثبيت الكتف، مع تمارين بسيطة لتحريك الكوع واليد، من غير تحريك الكتف نفسه

. المرحلة الثانية (من 6 لـ 12 أسبوع): نبدأ نحرّك الكتف تدريجيًا بتمارين خفيفة، عشان نرجّع المدى الحركي الطبيعي من غير ألم.

المرحلة الثالثة (من 3 لـ 6 شهور): تقوية عضلات الكتف بأوزان خفيفة وتمارين مقاومة، مع العودة التدريجية للأنشطة اليومية. وفي نهاية المدة، يقدر المريض يرجع لحياته الطبيعية… بشرط الالتزام بالعلاج الطبيعي والمتابعة مع الطبيب.

الخلاصة
لو حصل لك خلع في الكتف، حتى مرة واحدة، خد بالك… لإنه ممكن يتكرر
وشعورك بعدم الاستقرار أو الطقطقة مع الحركة ده علامة إن فيه حاجة مش مظبوطة في المفصل
التشخيص المبكر والعلاج السليم هما اللي بيحموا كتفك من التدهور والمضاعفات.