මාධ්‍ය ආවර්ජනා/Media Memories ජ්‍යෙෂ්ඨ මාධ්‍යවේදී පාලිත පෙරේරා Broadcaster Palitha PereraPart 3 of 3

#MediaHistoryLK #MediaMemoriesLK #PalithaPerera #CricketLK

පාලිත පෙරේරා නාමය වඩාත් ප්‍රකට ශ්‍රී ලංකාවේ පුරෝගාමී සිංහල ක්‍රිකට් විස්තර විචාරකයා ලෙසයි. එහෙත් ඔහු මුද්‍රිත, රේඩියෝ සහ ටෙලිවිෂන් යන ජනමාධ්‍ය තුනෙහිම දශක ගණනාවක් පුරා දස්කම් දැක්වූ මාධ්‍ය දැවැන්තයෙක්.

1963-1997 වකවානුවේ ශ්‍රී ලංකා ගුවන් විදුලි සංස්ථාවේ සේවය කළ ඔහු, එහි ප්‍රවෘත්ති අධ්‍යක්ෂ, සිංහල සේවා අධ්‍යක්ෂ ඇතුළු තනතුරු ගණනාවක් දැරුවා. ඔහුගේ වෘත්තිය ජීවිතය පුරාම හරවත් මාධ්‍යකරණයක යෙදෙන්නටත්, ජනමාධ්‍ය නවෝත්පාදනයන් කරන්නටත් ප්‍රශංසනීය මෙහෙවරක යෙදුණා.

මාධ්‍ය විචාරක නාලක ගුණවර්ධන සමඟ 2020 ජනවාරි 5දා කළ මේ සම්මුඛ සාකච්ඡාවේදී, පාලිත පෙරේරා සිය විචිත්‍ර වෘත්තීය ජීවිතයේ රසමුසු සහ වැදගත් තැන් ගැන ආවර්ජනයක යෙදෙනවා.

පළමුවන කොටසින් ඔහුගේ ක්‍රිකට් මාධ්‍ය ජීවිතය ගැන කතා අප කථා කළා. එය නරඹන්න:    • මාධ්‍ය ආවර්ජනා/MediaMemories ජ්‍යෙෂ්ඨ මාධ්...  

දෙවන කොටසේදී පාලිත විද්‍යුත් මාධ්‍ය සම්මුඛ සාකච්ඡා කිරීමේ පුරෝගාමී ආදර්ශය සහ අත්දැකීම් ගැන කතා කළා:    • මාධ්‍ය ආවර්ජනා - Media Memories ජ්‍යෙෂ්ඨ ම...  

මෙම තුන්වන කොටසින් පාලිත පෙරේරා කාලීන සඟරාවලට දක්ෂ විශේෂාංග ලේඛකයකු ලෙස කළ හපන්කම් ආවර්ජනය කැරෙනවා.

ලාබාල වියේ පටන්ම පාලිත පෙරේරා විවිධ පුවත්පත් හා සඟරාවලට විසින් විට ලිපි ලිව්වා. එහෙත් පාඨකයන් ඔහුගේ ලේඛන කුසලතා සියල්ල හඳුනා ගන්නේ 1980 දශකයේ වසර ගණනාවක් තිස්සේ 'කල්පනා' මාසික සඟරාවට ඔහු සම්පාදනය කළ විශේෂාංග ලිපි හරහායි. තොරතුරු ගවේෂණයට, සම්මුඛ සාකච්ඡා කිරීමට සහ හරබර ලිපි රසබර ලෙසින් ලියන්නට පාලිතට තිබෙන හැකියාවෙන් වැඩිපුරම වැඩ ගත්තේ කල්පනා සංස්කාරක ප්‍රවීණ මාධ්‍යවේදී ගුණදාස ලියනගේ සූරීන් යයි කිව හැකියි.

විශාරද අමරදේව සහ නන්දා මාලිනී වැනි විශිෂ්ට කලාකරුවන් පිළිබදව සඟරාවේ විස්තරාත්මක සහ විශිෂ්ට කවරයේ කතා (cover stories) පාලිත ලියු සැටි නිතිපතා කල්පනා පාඨකයන්ට තවමත් මතක ඇති.

එහෙත් ඔහු ලියූ කල්පනා ලිපි අතරින් වැඩියෙන්ම ආන්දෝලනයක් ඇති කළේ 1984 පෙබරවාරි මාසයේ කල්පනා කවරයේ කතාවයි. 1982 ඔක්තෝබරයේ ශ්‍රී ලංකා ක්‍රිකට් ක්‍රීඩක පිරිසක් දකුණු අප්‍රිකාවේ කැරලිකාර ක්‍රිකට් සංචාරයකට යොමු වීම පිටුපස තිබූ වෙනත් කිසිම මාධ්‍යයක් ඒ වනතුරු හෙළි නොකළ තොරතුරු රාශියක් ඒ හරහා හෙළිදරවු කෙරුණා.

කැරලිකාර කණ්ඩායමේ නායකත්වය හෙබවූ බන්දුල වර්ණපුර සහ කළමනාකරු වූ ටෝනි ඕපාත සමග කළ ප්‍රබල සමග සාකච්ඡා දෙකක් සහ වෙනත් අදාළ ලිපි ගණනාවක් අඩංගු වූ එම සඟරා කලාපය ඉතා ඉක්මනින් විකිණුනු අතර ශ්‍රී ලංකා ක්‍රිකට් පාලක මණ්ඩලයේ අක්‍රමිකතා ඒ හරහා අනාවරණය වුණා. ඊට ටික දිනකට පසු ඒ ගැන පොලිසියේ අපරාධ විමර්ශන අංශය (CID) පාලිතගෙන් දීර්ඝ ප්‍රකාශයක් ලබා ගත්තා.

ක්‍රීඩා වාර්තාවක් ලිවීම නිසා CID යන්නට සිදු වූ මෙරට මුල්ම මාධ්‍යවේදියා බවට පාලිත පත්වුණේ ලෙසයි. එම ප්‍රශ්න කිරීමේදී කැරලිකාර ක්‍රීඩකයන්ගෙන් මුදල් ලබා ගෙන මේ ලිපි ලිව්වා දැයි පොලිසිය අසන ලදුව, පාලිත දැඩි සේ ප්‍රකාශ කළේ මෙයයි:

“මේ මගේ මාධ්‍යවේදී ජීවිතයේ මගෙන් අසන ලද ඉතාම පහත් ප්‍රශ්නයයි. මම මහ පාරේ හිඟා කෑවත් කාගෙන්වත් සල්ලි අරගෙන කතා ලියන ජාතියේ කෙනෙක් නෙවෙයි!”

මෙම දීර්ඝ මාධ්‍ය ආවර්ජනා සාකච්ඡාවේ අවසාන කොටසේදී, 1980 දශකයේ ජනාධිපති ජේ ආර් ජයවර්ධන නිල විදේශ සංචාරවල නිරත වන විට ඒවා වාර්තා කිරීම සඳහා ගුවන් විදුලි සංස්ථාව වෙනුවෙන් රාජ්‍ය නායකයා සමඟ විදෙස් ගත වූ අවස්ථා කීපයක මතකයන් පාලිත පෙරේරා සිහිපත් කරනවා.

නිල ජීවිතයේදී ගරු ගාම්භීර චරිතයක් වූ ජේ ආර්, පෞද්ගලික ජීවිතයේදී සැහැල්ලුවෙන් විනෝදයෙන් සිටි අයෙක් බවත්, අහිංසක විහිලු කිරීමට සමතෙක් බවත් පාලිත කියනවා. “රාජ්‍ය තාන්ත්‍රිකභාවය එකක් සාමාන්‍ය පුද්ගලයා තව එකක්. ජේ ආර් ගේ මේ මුහුණවර දෙකම සමීපව දකින්නට මට හැකි වුණා.”

“චොක්ලට් කන්නට වූ ජේ ආර් තරම් රුසියෙක් මම නම් දැකලා නැහැ! ඔහු අපට සැලකුවේ දරුවන්ට වගේ. ඔහු සමඟ නිල සංචාරවල ගිය (රූපවාහිනියේ) රවිනාථ ආර්යසිංහට සහ මට රසවිදින්න විශාල අයිස්ක්‍රීම් බඳුන් හෝටල් කාමරවලට ඔහු එවනවා…” මෙවැනි මතකයන් රැසක් මේ අවසාන කොටසේ අඩංගුයි.

1985 ඔක්තෝබරයේ ජේ ආර් සමග කියුබාවෙ හවානා අගනුවරට ගිය සැටිත්, එහිදී කියුබානු නායක පිදෙල් කැස්ත්‍රෝ හමුවී ඔහු සමග සම්මුඛ සාකච්ඡාවක් කළ සැටිත් පාලිතගේ විචිත්‍ර මතකයන් තුළින් අවදි කරනවා.

රාජ්‍ය මාධ්‍ය තුළ කෙසේ හෝ දේශපාලක බලපෑම්වලින් බේරී සිටියත් අන්තිමේදී සමහර සහෝදර මාධ්‍යවේදීන්ගේ සහ නිලධාරීන්ගේ නිරන්තර කෙනහිලිකම් නිසා වසර 35ක් සේවය කළ ගුවන් විදුලි සංස්ථාවෙන් ඉල්ලා අස්වී ගෙදර යන්නට පාලිත තීරණය කළා. ඒ 1997දී.

එයට පසුබිම් වූ සිදුවීම් ද ඔහු සැකෙවින් ආවර්ජනය කරනවා. මහගම සේකර පැදි පෙළක් උපුටා දක්වමින් පාලිත කියන්නේ “කලාමැදිරියෝ, කලාමැදිරියෝ, උඹේ ඔය එලිය නිවාපන්...කියලයි. මගේ එළිය දරාගන්නට බැරි සමහර මිතුරන් මාව විනාශ කළා!”

Key words:
Palitha Perera, පාලිත පෙරේරා, Sri Lanka Broadcasting Corporation (SLBC), Radio Ceylon, ශ්‍රී ලංකාවේ ජනමාධ්‍ය ඉතිහාසය, නාලක ගුණවර්ධන, Nalaka Gunawardene, මාධ්‍ය ආවර්ජනා, ශ්‍රී ලංකා ගුවන් විදුලි සංස්ථාව, ශ්‍රී ලංකා ක්‍රිකට් පාලක මණ්ඩලය, ගාමිණී දිසානායක, බන්දුල වර්ණපුර, 1982 දකුණු අප්‍රිකා කැරලිකාර සංචාරය, Sri Lanka Rebel Cricket Tour of South Africa 1982, Bandula Warnapura, Tony Opatha, ගුණදාස ලියනගේ, කල්පනා සඟරාව , ජනාධිපති ජේ ආර් ජයවර්ධන, රවිනාථ ආර්යසිංහ, පිදෙල් කැස්ත්‍රෝ