ԵՐԵՔ ՀԱՆԴԻՊՈՒՄ ՍՈՍ ՍԱՐԳՍՅԱՆԻ ՀԵՏ

«Պետք է ապրել երկու բանի համար՝ պետք լինելու և գործելու: Մեր ժողովուրդը դարձել է գանգատաբերան ժողովուրդ: Այսքան չի կարելի վատատես լինել, լավը չտեսնել: Շատ լավ բաներ են կատարվում:»
ՍՈՍ ՍԱՐԳՍՅԱՆ
1929 թվականի հոկտեմբերի 24-ին Ստեփանավան քաղաքում ծնվել է ապագայում հայ մեծանուն դերասան ԽՍՀՄ ժողովրդական արտիստ,հայ թատրոնի սիրելի Պապը՝Սոս Սարգսյանը:
Մեր հայ մշակույթը ասես հազարավոր տարիների մի հզոր կաղնի լինի , որի արմատները շատ խորն են և ճյուղավորված: Եվ յուրաքանչյուրը դրանցից սնել և հարստացրել է այդ կենաց-ծառը:Սոս Սարգսյանը այդ արմատների զգալի մի մասնիկն է,առանց որի անհնար է պատկերացնել հայ թատրոնը,կինոն,ընդանրապես հայ մշակույթը և ավելին ասեմ հայ և Հայաստան հասկացողությունները: Այսօր նման հանճարների սով է: Ոսկե դարաշրջանի, այսինքն 20-րդ դարի այդ ֆենոմենը,առայժմ այդպես էլ մինչև վերջ չբացահայտվեց:Ու՞ր կորան իրական արժեքները,ինչու՞ առաջ քաշվեցին ապաշնորհությունը, լկտիությունը, անճաշակությունը,դաժանությունը:Իրական արժեքները անտեսվեցին ու մոռացության մատնվեցին: 30 տարին հայ մշակույթի կյանքից պարզապես ջնջվեց: Մտածում էինք,որ անկախությունը նոր թափ կտա մեր երկրին,բոլոր բնագավառները ավելի կծաղկեն,մանավանդ մշակույթը: Բայց եկ ու տես,որ անկախություն կոչվող արժեքը անտեսվեց և դարձավ անկապություն,կուսակցական թալան, առ ու վաճառք: Կասեք պատերազմ էր… Իսկ 40-ականներին պատերազմ չի՞ եղել,երբ ծնվում էին մեկը մյուսի հետևից գլուխգործոցներ …
Սոս Սարգսյանը,ստանալով կրթություն խորհրդային տարիներին, միևնույն ժամանակ լինելով անչափ հայրենասեր Մարդ միշտ ցավում էր,որ իր երկիրն ու հայ մշակույթը անդունդ է գլորվում,ինչի վկայությունն է նրա խոսքը օպերային թատրոնի բեմից: Որքան ցավ կա նրա այդ ելույթում:Սակայն,ինչպես ասում են Ասողին լսող էր պետք:
Պահպանենք մեր մշակույթը:Ու թող այս սուրբ օրով,երբ մենք հիշում ենք մեր մեծերից մեկին,մարդիկ աշխարհում գոնե մի քիչ բարիանան ու ժպտան միմիանց: Ու թող Լույս իջնի շիրիմիդ Մեծատառով Մարդ, թող քո անցած կյանքը դասագիրք դառնա սերունդների համար: Դու եղել ես,կաս ու կմնաս,որպես քո ժողովրդի հենասյուներից մեկը:
Բազմիցս եմ հանդիպել Սոս Սարգսյանին և՛ կյանքում, և՛ բեմում և՛ եթերում: Իրոք երջանիկ մարդ եմ և անչափ հարուստ: Բա դա հարստություն չէ լինել նման Հսկաների ժամանակակիցը:
Ներկայացնում եմ ընդամենը երեք հանդիպում Վարպետի հետ 3-րդ ալիքի շրջանակներում -1994,1997 և1998 թվականներ: Վայելեք Մեծի խոսքը:
ԾՆՈՒՆԴԴ ՇՆՈՐՀԱՎՈՐ,ԱՄԵՆԱՅՆ ՀԱՅՈՑ ՊԱՊ: