ປະເທດຊາດຈາລຶກບຸນຄຸນ! ວັນຄ້າຍວັນເກີດ ຂອງລຸງໜູຮັກ ພູມສະຫວັນ ຄົບຮອບ 111 ປີ ຜູ້ນໍາທີ່ແສນເຄົາລົບຮັກ

ລະນຶກເຖິງວັນຄ້າຍວັນເກີດ ທ່ານ ໜູຮັກ ພູມສະຫວັນ ຄົບຮອບ 111 ປີ ( 09 ເມສາ 1914 - 09 ເມສາ 2025 )

ປະທານ ໜູຮັກ ພູມສະຫວັນ ເກີດວັນທີ 9 ເມສາ ປີ 1914 ປະທານ ປະເທດແຫ່ງ ສປປ ລາວ ຜູ້ທີ 3, ຜູ້ນຳພັກ-ລັດ, ການນໍາປະຕິວັດ ລຸ້ນທໍາອິດ ຂອງການປະຕິວັດລາວ ເພິ່ນແມ່ນຜູ້ໜຶ່ງທີ່ເປັນແບບຢ່າງທີ່ດີໃນການ ເສຍສະຫຼະເພື່ອປະເທດຊາດ ໜຶ່ງໃນການສະແດງອອກຂອງເພິ່ນ ເຊັ່ນຕົວຢ່າງ: ສູນກາງພັກຕົກລົງຢາກສ້າງເຮືອນຫຼັງໃຫຍ່ງາມໆໃຫ້ເພິ່ນ ແຕ່ລຸງຕອບວ່າ: “ຂອບໃຈທີ່ມີ ຄວາມຫວັງດີຕໍ່ເຮົາ, ເຮົາວ່າຢູ່ຄືແນວນີ້ກໍດີແລ້ວ ຄິດເຖິງສະໄໝທຳການຕໍ່ສູ້ກູ້ຊາດ ພວກເຮົາຍັງພາກັນນອນຢູ່ໃນປ່າດົງ, ນອນຢູ່ໃນຖໍ້າ ຫຼື ກ້ອງກົກໄມ້ໃຫຍ່ ທາກກັດ ຍຸງກິນ ຝົນຕົກຮໍ່າໃສ່ຫົວກໍ່ຍັງຢູ່ໄດ້. ຢູ່ຄືແນວນີ້ ແມ່ນດີຫຼາຍແລ້ວ ກໍາແພງວ່າມັນເອນງ່ຽງຈະລົ້ມກໍເອົາໄມ້ແຂງໆໄປຄໍ້າໄວ້ບໍ່ໃຫ້ມັນລົ້ມ ເອົາເງິນກ້ອນນັ້ນໄປຊ່ວຍເຫຼືອປະຊາຊົນທີ່ພວກເຂົາຍັງທຸກຍາກຢູ່ ຈະດີກວ່າ ເນີ....ເນີ...! ຖ້າປູກໃຫ້ເຮົາໃໝ່ໃຫຍ່ງາມ ເຮົາຈະບໍ່ຢູ່ ເພາະຄິດອາຍປະຊາຊົນ ເນີ...! "

ທ່ານ ໜູຮັກ ຜູ້ເປັນແບບຢ່າງໃຫ້ແກ່ ລູກຫຼານ, ພໍ່ແມ່ປະຊາຊົນ ໃນການໃຊ້ຊີວິດທີ່ລຽບງ່າຍ, ປະຢັດມັດທະຍັດ, ໃຊ້ຊີວິດຕິດແທດກັບປະຊາຊົນ ລົງເຖິງກົກເຖິງຮາກຖານ ແລະ ຄວາມມີລະບຽບວິໄນ.

ສົມຄຳລໍ້າລືທີ່ວ່າ ພໍ່ເຖົ້າແສງສະຫວ່າງ ເປັນຜູ້ນຳທີ່ນຳເອົາແສງສະຫວ່າງເຂົ້າປະຊາຊົນໃນທຸກຫົນແຫ່ງ. ປະຊາຊົນຍັງເວົ້າໃຫ້ເພີ່ນວ່າ ພໍ່ເຖົ້າມີເສື້ອຜືນດຽວ ນຸ່ງມາແລ້ວກະຊັກພ້ອມ ມື້ອື່ນໄປປະຊຸມ ກະນຸ່ງຜືນນັ້ນຕໍ່.

ເນື່ອງໃນໂອກາດຂໍ່ານັບຮັບຕ້ອນວັນສຳຄັນຕ່າງໆຂອງພັກ-ລັດ ຂອງຊາດ ໂດຍສະເພາະກະກຽມຂໍ່ານັບຮັບຕ້ອນວັນເກີດ ທ່ານ ໜູຮັກ ພູມສະຫວັນ ຄົບຮອບ 111 ປີ ( 09 ເມສາ 1914-09 ເມສາ 2025 ) ມາຮອດນີ້,

ເພື່ອລະລຶກເຖິງຄຸນງາມຄວາມດີ ແລະ ຜົນງານອັນໃຫຍ່ຫຼວງຂອງ ທ່ານ ໜູຮັກ ພູມສະຫວັນ ທີ່ໄດ້ເສຍສະຫຼະອຸດທິດຕົນເພື່ອປະເທດຊາດ ເພື່ອປະຊາຊົນໃນໄລຍະຜ່ານມາ.

📌ເຊີນຊວນແຂກພາຍໃນ ແລະ ຕ່າງປະເທດ ເຂົ້າມາທ່ຽວຊົມອະນຸສອນສະຖານ ທ່ານ ໜູຮັກ ພູມສະຫວັນ
🕗 ເປີດເວລາ: 08:30-11:30-13:30-16:00.
📍ສະຖານທີ່ຕັ້ງຢູ່ ບ້ານ ສະພານທອງເໜືອ, ເມືອງ ສີສັດຕະນາກ (ຮ່ອມ2), ນະຄອນຫຼວງວຽງຈັນ.

ເບີໂທຕິດຕໍ່:
020 9923 2809
020 5808 0333
020 2958 9688