وفا کے خوگر وفا کریں گئے یہ طے ہوا تھا وطن کی خاطر جئیں مریں گے یہ طے ہوا تھا|حنیف اسعدی

وفا کے خوگر وفا کریں گے یہ طے ہوا تھا
وطن کی خاطر جئیں مریں گے یہ طے ہوا تھا

بوقت ہجرت قدم اٹھیں گے سُوئے منزل
تو بیچ رستے میں دم نہ لیں گے یہ طے ہوا تھا

چہار جانب بہار آئی ہوئی تھی لیکن
بہار کو اعتبار دیں گے یہ طے ہوا تھا

تمام دیرینہ نسبتوں سے گریز کر کے
نئے وطن کو وطن کہیں گے یہ طے ہوا تھا

خدا کے بندے خدا کی بستی بسانے والے
خدا کے احکام پہ چلیں گے یہ طے ہوا تھا

بغیر تخصیص پس و بالا ہو کر اک مکاں میں
دئیے مساوات کے جلیں گے یہ طے ہوا تھا

کسی بھی الجھن میں رہبروں کی رضا سے پہلے
عوام سے اِذن عام لیں گے یہ طے ہوا تھا

تمام تر حل طلب مسائل کو حل کریں گے
جو طے نہیں ہے وہ طے کریں گے یہ طے ہوا تھا

وفا کے خوگر وفا کریں گئے یہ طے ہوا تھا
وطن کی خاطر جئیں مریں گے یہ طے ہوا تھا
حنیف اسعدی