Tv Klan -Rama: Vendimi për Ballukun, absurd dhe i rrezikshëm

Përveçse absurd e të paprecedent në asnjë vend tjetër, kryeministri Rama e vlerëson si të rrezikshëm për cenimin e kufirit që ndan pushtetet e pavarura nga njëra-tjetra, vendimin e pezullimit nga Gjykata e Posaçme për zv.kryeministren Belinda Balluku.

“Pezullimi i një ministri është në vetvete absurd si koncept, sepse të pezullosh një ministër nuk do të thotë të pezullosh thjesht një individ. një funksionar publik të cilitdo nivel. Por do të thotë të pezullosh një autoritet me fuqi ekskluzive vendimmarrëse në një a më shumë. Prandaj ministri ose rri në detyrë, ose largohet nga detyra: me dorëheqje, nga Kryeministri, apo in extremis me dënim të formës së prerë sipas ligjit. Tjetër nuk ka. Prokuroritë e gjykatat nuk hyjnë fare në këtë mes dhe nuk e bëjnë kurrsesi këtë. Asnjëherë. Askund në Europë”.

Rama sjell në komunikimin e përjavshëm në podcastin Flasim qëndrimin e Venecias lidhur me ndërhyrjen e gjyqësorit në kompetencat e ekzekutivit.

“Gjykatat nuk duhet të pezullojnë anëtarë të qeverisë për sa kohë një ministër është figurë politike, pjesë e ekzekutivit, përgjegjës para Parlamentit dhe Kryeministrit. nëse gjykata e pezullon, ajo praktikisht ndërhyn në punën e qeverisë, ndërron përbërjen e ekzekutivit, merr kompetenca që i takojnë Kryeministrit dhe Presidentit. Dhe kjo konsiderohet nga Venecia shkelje e palejueshme e kufirit ndarës mes pushteteve.

Duke e bërë këtë, gjykatat krijojnë mundësinë e instrumentalizimit të drejtësisë dhe Venecia paralajmëron shpesh, shqip fare, shtrirjes së krahut të gjyqësorit përtej kufirit ndarës me politikën, sepse kjo për pasojë i hap rrugë presioneve politike ndaj qeverisë, destabilizimit institucional, manipulimit i ekzekutivit përmes proceseve penale.

Së treti, ministrat kanë funksione politike, jo administrative, dhe Venecia e ka thënë shumë herë:
Masat e pezullimit vlejnë për nëpunësit, jo për anëtarët e qeverisë, sepse ministri nuk është “zyrtar administrativ”, por autoritet politik.

Pezullimi gjyqësor i ministrit është de facto presion për shkarkimin e tij, duke qenë se kur pezullohet një ministër, nuk pezullohet një individ, por paralizohet krejt vendimmarrja për një apo më shumë sektorë që ministri mund të mbulojë. Dhe kjo është këmbë e krye jokushtetuese.

Komisioni i Venecias e ka theksuar shprehimisht: Një prej parimeve të demokracisë parlamentare është që qeveria mund të shkarkohet vetëm nga organet politike, jo nga organet gjyqësore.”

Ndërsa Gjykata Europiane e Strasburgut, sipas kryeministrit, nuk ka shqyrtuar asnjë precedent të kësaj natyre, ndaj Rama e sheh këtë si provë që në shtetet europiane nuk mund të ndodhë që të merren vendime pezullimi për anëtarët e kabinetit qeveritar nga ana e gjyqësorit.

“Por ama ka disa parime shumë të qarta të Gjykatës Europiane që e ndalojnë parimësisht këtë aventurë antidemokratike. Së pari, Strasburgu thotë se masat e sigurisë nuk mund të përdoren për qëllime politike. Së dyti, për Strasburgun ministrat janë shprehje e vullnetit demokratik. Çdo masë që ndërpret apo cenon funksionimin e institucioneve të zgjedhura duhet të justifikohet me standardin më të lartë demokratik.”

Kryeministri shpreson që Gjykata Kushtetuese, të cilës ai iu drejtua 24 orë pas vendimit të pezullimit, të ndalojë këtë shpikje shqiptare që e quan të rrezikshme për demokracinë.

E nëse Shqipëria do të hynte në analet e historisë së drejtësisë europiane me një shpikje të tillë, kjo do të ishte, largqoftë, një shfaqje ulëritëse papjekurie demokratike dhe institucionale. Uroj që Gjykata Kushtetuese t’ia kursejë këtë shfaqje Shqipërisë”.
SUBSCRIBE to "RTV KLAN" on YouTube for more videos!
Për më shumë informacione vizitoni faqen tonë web https://tvklan.al/kategoria/klan-news/
Follow Klan News on Facebook:   / klannews  
Follow @klannews on Instagram:   / tvklannews  
#KlanNews #KlanNewsLajme #TvKlan