【迪士尼好成績對零售業有啟示20周年希望一齊開心吓冇洪港鐵路乜都到喉唔到肺】

今日迪士尼出完業績後上嚟立法會講佢哋嘅最新進展。雖然我已經公開講過好多次，今日我要再讚吓香港迪士尼嘅管理層同成個團隊嘅努力，尤其係佢今年賺8.4億，創開園以嚟嘅新高，比起過去14年賺錢嗰3年，2012，13，14加埋6.8億仲要多，真係寫個服字！睇細數，佢總收入比去年，只係多咗五成，但Ebita就多咗150%，9億到23億，即係好多開支係固定嘅！係一個High Margin, High fixed cost嘅Business.
睇返啲入場客來源，因為港人北上消費嘅關係，本地客下跌咗三成，但內地客竟然上升90%，而海外客仲勁，上升咗140%。呢啲數字對本港零售業界係好有啟發性，點解全港零售總額連跌12個月，去年12月實施左深圳1600萬人一簽多行，啱啱個二月仲係跌咗14%，而迪士尼又做得咁好。

過去二十年，我哋啲零售業就食老本，根本就冇新意。而相反，香港迪士尼就整咗個全世界第一個嘅「魔雪奇緣世界」，係莫偉庭（Michael Moriarty)行政總裁呢位真係魔術奇才，有先見之明搶咗返嚟，聽講其他區迪士尼俾佢搶到風頭都有啲意見。香港迪士尼冇咗佢可能都幾大鑊。而我覺得迪士尼要繼續發展就一定要持續用內部資源投資，用埋第一期剩低嘅地，發展多啲有大型機動遊戲嘅園區，好似魔雪奇緣咁有規模，又係全球第一嘅，例如「Inside Out 玩轉腦朋友」主題區，去啲唔同嘅情緒區，一定好受歡迎。

今年係香港迪士尼20周年嘅紀念日，我點都要揼佢心口俾啲着數大家。紀念日正日係9月12日，星期五。我就建議不如喺兩日後嘅9月14日，星期日，攞園區假日一半容量，大約萬五個名額，攞出嚟抽籤，免費俾香港市民入去樂園玩，另一半就正常賣飛，限住啲人數唔好迫爆迪士尼。

局長就話迪士尼嘅成功有好多方面，其中「魔雪奇緣」係一個新鮮嘅產品，復甦後大家好耐冇嚟迪士尼樂園，有相當大嘅吸引力。零售業嘅數據方面，局長就唔認為好差，話今年二月比上年二月跌咗14%係因為上年二月係農曆新年今年唔係，又話上年年頭有個報復式出遊，今年長假期結構又唔同，更加多人出咗遠門。如果睇返今年二月同有農曆年嘅一月比較，零售仲升咗1%左右。而喺迪士尼擴展方面，局長就話起緊嘅Marvel係一個大型嘅園區，一定會有刺激機動遊戲。仲話魔雪奇緣可以做到全球最大最好，Marvel園區到會做得大做得好。

而至於慶祝迪士尼20周年生日，有啲咩回饋俾香港市民，局長話聽到我嘅意見，會返去考慮。

對於局長闡述嘅零售業數據，其實我呢啲真係親身感受，最簡單你將一月同二月加埋，比較返上年嘅一月同二月，都係跌咗16%， 每月平均數都係低過上年8%。所以局長千祈唔好以為已經大步檻過，開始復甦！
我明白呢個唔係政府嘅問題，而家係我哋零售業要學迪士尼咁投資創新先可以自救。

講到最後，不得不提交通配套，我一直跟追緊政府嘅「洪港鐵路」，中途站就喺欣澳，一通車1600萬深圳居民就可以一地兩檢，車都唔使落直到欣澳迪士尼，絕對可以吸引到更多嘅內地客。不過去到今日，政府都仲同我講緊要研究起。之前北都「片區開發」嘅宣傳品都仲有呢條「洪港鐵路」，最近文件講北都，呢段就直程冇咗影。我知羅淑佩局長好有心，發展成個大嶼山旅遊業不遺餘力，但係如果其他交通配套跟唔上，最後效果可能大打折扣，佢識飛都冇用，所以呢條「洪港鐵路」唔單只係本地交通咁簡單，仲係融合大灣區，北部都會區，港九市區嘅一條大動脈，但係所有官員嘅標準答案，包括財爺本人，竟然都講唔出一個目標時間表！！咁即係點呀？