SERIKALI YA AWAMU YA NANE YAENDELEA KUIMARISHA MJI MKONGWE KUPITIA USHIRIKIANO NA WADAU

Serikali ya Mapinduzi ya Zanzibar ya Awamu ya Nane, inayoongozwa na Rais wa Zanzibar na Mwenyekiti wa Baraza la Mapinduzi, Dkt. Hussein Ali Mwinyi, itaendelea kushirikiana kwa karibu na wadau wa maendeleo wakiwemo wa sekta binafsi, kwa lengo la kuyaimarisha maeneo ya kihistoria hususan Mji Mkongwe, ili kulinda, kuhifadhi na kutunza alama za urithi na utamaduni kwa manufaa ya kizazi cha sasa na kijacho.

Kauli hiyo imetolewa na Waziri wa Vijana, Ajira na Uwezeshaji, Mhe. Shabaan Ali Othman, wakati wa uzinduzi rasmi wa Hoteli ya FORT VIEW LUXURY AND ACCOMMODATION iliyojengwa katika eneo la Stone Town, Zanzibar, ikiwa ni sehemu ya shamrashamra za kuelekea kilele cha Maadhimisho ya Mapinduzi Matukufu ya Zanzibar.

Katika hafla hiyo, Mhe. Waziri amesisitiza umuhimu wa kuwekeza katika mafunzo ya ujuzi kwa vijana ili waweze kushindana katika soko la ajira, kwa kushirikiana na taasisi za mafunzo pamoja na wadau wa maendeleo. Aidha, ametoa wito kwa vijana kujitokeza na kuzitumia fursa zilizopo kama njia ya kujijengea maisha bora kiuchumi.

Vilevile, amewahakikishia wawekezaji kuwa Serikali itaendelea kuweka mazingira rafiki ya uwekezaji ili kuongeza ajira kwa vijana, kukuza sekta binafsi na kuchangia utatuzi wa changamoto ya ajira, ambayo ni miongoni mwa changamoto kubwa kwa vijana duniani kote.

Kwa upande wake, Katibu Mkuu wa Wizara ya Utalii na Mambo ya Kale Zanzibar, Dkt. Aboud Suleiman Jumbe, amesema uzinduzi wa hoteli hiyo ni mfano bora wa utekelezaji wa maono ya Rais Dkt. Mwinyi katika kuwakaribisha na kuwawezesha wana Diaspora kurejea nyumbani na kuwekeza katika miradi ya kimkakati ya kitaifa, hususan katika sekta ya utalii na urithi wa mambo ya kale.

Dkt. Aboud amefafanua kuwa hoteli hiyo ina vyumba sita vya mtindo wa apartments, ambapo kila apartment ina uwezo wa kuchukua wageni wanne hadi sita. Ameongeza kuwa mradi huo unatarajiwa kukamilika ukiwa na mkahawa (café), eneo la makaazi pamoja na galeria ya sanaa na makumbusho (gallery).

Ameeleza kuwa ukarabati wa awali wa mradi huo tayari umegharimu kiasi cha Dola za Kimarekani 800,000 sawa na Shilingi za Tanzania bilioni 2.5, ikiwa ni hatua muhimu katika kuimarisha utalii na uhifadhi wa urithi wa Mji Mkongwe.

#AwamuYaNane
#MjiMkongwe
#UwekezajiZanzibar
#UtaliiNaUrithi
#VijanaNaAjira
#MapinduziMatukufu