Snorre A plattforma + Arbeidartransport med MF Vestgar, mars 1992

Ferdigstilling av Saga Petroleum si Snorre plattform i Digernessundet, mars 1992.

Først ser ein bustadplattforma Regalia teste samankopling med Snorre.
Regalia husa ekstra mannskap som skulle arbeide med ferdigstillinga ute på Snorrefeltet i Nordsjøen.

Medan Snorre låg i Digernessundet, vart arbeidarar frå Aker Stord frakta ut med fleire båtar, mellom anna skyssbåten "Høydalsfjord II" og ferja "Vestgar".
Sistnemnde var operert av Agasøster Båtservice.

Snorre A vart levert frå Aker Stord i april 1992 og ligg i dag på Tampenområdet i Nordsjøen, kring 150 km vest av Florø.
Plattforma er flytande og er forankra i havbotnen med strekkstag. Snorre A er ein integrert bore-, produksjons- og boligplattform, og produksjonen starta i august 1992.
I 1999 vart Saga petroleum kjøpt opp av Norsk Hydro, og 1. januar 2003 tok Statoil over som operatør, noko dei framleis er i skrivande stund.
På kvelden 28. november 2004 oppstod det ein ukontrollert gassutblåsning ved Snorre A. Hendinga var så alvorleg at personell vart evakuert med helikopter. Heldigvis endte det godt, utan at nokon kom til skade.

MF Vestgar vart bygd ved Haugesund mekaniske verkstad i 1956, og levert til HSD som "Rosendal". Ferja gjekk i rute for HSD fram til 1979, då den vart seld til Øygarden & Sotra rutelag, og omdøypt "Vestgar".
I 1985 vart den kjøpt av P/R Bosvik & Agasøster Båtservice i Bergen, før den igjen vart seld til Agasøster Båtservice, Rubbestadneset, i 1988.
Forutan 2 år i eige hos AB Shipping AS på Stord/Bergen 1998-2000, vart "Vestgar" verande i eige hos Agasøster fram til 2007, då den vart seld til Nord Noreg og omdøypt "Bogøy i Tromsø".
Båten vart til slutt taua til Fredrikshavn i Danmark for opphogging i 2014.