Қармақшыда күріш егу науқаны басталды

Қармақшыда күріш егу науқаны басталды. Дәстүрлі дән себу шарасы аудандағы іргелі шаруашылық «Тұрмағамбет» жауапкершілігі шектеулі серіктестігінің егіс алқабында өтті. «Дала күні» жиынында су тапшылығының алдын алу, егісті әртараптандыру мәселесі сөз болды.
Дәстүрден жаңылмаған қармақшылықтар үлкендерден бата алып, берекелі іске білек сыбана кірісіп кетті. Аудан бойынша биыл жалпы көлемі 25231 гектар жерге ауыл шаруашылығы дақылдарын орналастыру жоспарланған. Оның ішінде күріштің көлемі – 12 500 гектарды құрайды. Өткен жылы тіршілік нәрінен тапшылық көрген шаруашылық құрылымдары биыл егіс көлемін қысқартыпты. Есесіне суды аз қажет ететін мал азықтық дақылдар мен бақша өнімдеріне басымдық беріп отыр.
Егісті әртараптандыру мақсатында биыл 2200 гектарға бидай, мақсары, арпа егілді. Сонымен қатар, шаруашылық құрылымдары су үнемдеу технологиясын қолдану арқылы жоңышқа сеуіп, алма бағын баптамақ.
Ал, «Тұрмағамбет» серіктестігі былтыр 2 мың гектарға күріш еккен, биыл егіс көлемін 500 гектарға азайтыпты. Сондай-ақ күріштің жаңа сортын өндіріске енгізіп отыр.
Шаруашылық материалдық-техникалық базасын жыл өткен сайын жаңартып келеді. Өйткені ескі техниканың жүргенінен бұзылғаны көп. Сосын ойдағыдай өнім ала алмайсың,- дейді бас агроном.
Ерінбей еңбек еткенге жердің берер несібесі мол. Сондықтан шаруалар егіс басында күні түні жұмыс істеуде. Су келетін каналдар тазаланып, гидротехникалық нысандар жөндеуден өтті.
Серіктестік ауылдың дамуына да өз үлесін қосуда. Атап айтсақ, шаруашылықтың демеушілігімен жаңа мектептің құрылысына жобалық сметалық құжат дайындалды.
Серіктестік төрағасы қайырымдылық шаралардан да қалыс қалмайды. Мұнан бөлек бақша егемін деген азаматтарға арнайы жер дайындалып берілген. Яғни, тұрғындарға күнделікті тұтынатын картоп, жуа, сәбізін егіп қысқы азығын жинап алуға үлкен мүмкіндік жасалып отыр.
Сайт - https://qyzylordatv.kz/ru/live
Facebook -   / qyzylordatv  
Instagram -   / qyzylordatv  
Telegram - https://t.me/qyzylords_tv
Tiktok -  / qyzylorda_tv