උඩමාලිබොඩින් තනිවම සිරිපා මළුවට Solo Journey to Sri Pada via Deraniyagala Uda Maliboda Trail

පන්දෙණියෙන් උඩමලුවට තනිවම.... කවුරුත් දන්නෙ උඩමාලිබොඩ වනගත මාර්ගය කියල තමයි ඉතිම්.... කතාව පටන්ගන්නෙ දැන් ටික කාලෙකට උඩදි මෙන්න මෙහෙම....

සිරිපා කරුණාව කියන්නෙ මට නම් සොබාදම් චාරිකාවක් මිසක් වන්දනා ගමනක් නම් නෙවෙයි.... ඉතින් මම හොයන්නෙම අඩවියෙ යන්න තියෙන නිහඬ නිස්කලංක වනපෙත් ඇලදොල.... ඉතින් දැරණියගල උඩමාලිබොඩ මාවතෙන් යන්න හිතුවත් ඒකට පොඩි අවුලක් තිබ්බ.. බස් එකේ ගිහින් කැලේ පටන් ගන්න තැනට තියෙන 7km පයින් ගිහින් ගමන පටන් ගත්ත නම් රැ වෙන්න කලින් කැලෙන් එලියට එන්න බැරි වෙනව කියන එක තමයි මට තිබ්බ අවුල... ඒ අවුලට විසඳුමක් හොය හොය ඉද්දි අපේ නදීශානි නංගිට කතා කලේ බස් විස්තර අහ ගන්න... මෙන්න ඒ පාර කෙල්ල කියපි අනේ අක්කෙ එන්න අපේ ගෙදර මම ඔයාව උදේම ගිහින් දාන්නම් මගට කියල කෙල්ල කියෝගෙන ගියා... ඒත් ඉතිම් කෙල්ල ඒම කීවට මටත් පොඩ්ඩක් අවුල් කෙල්ලට කරදර කරන්න.... ඔහොම දෙගිඩියාවෙන් ඉද්දි අපේ මාරෙ මල්ලිල ගිය සතියෙ ඔය පාරෙන් ගියා... මෙන්න මෙයා කිව්වනෙ අක්කෙ ලොරියක් තියේ ජයවීර අයියගෙ ඒ ලොරියෙ කට්ටිය අරන් යනව එක ටර්න් එකට පොඩි ගානයි ගන්නෙ කියල.... මම තනියෙන් යන නිසා මාරෙ ඒකත් හොයන් ඇවිල්ල තිබ්බ ජයවීර අයිය හරි පුතා හරි බයික් එකේ මාව ගිහින් දායි කිව්ව.... ඔන්න ඉතින් උන වැඩිවෙලා ඊලග සති අන්තෙම යන්න ඕන උනා....

පාන්දර ඇහැරිලා ගමනක් යන එක කවදාවත් වෙලාවට නොකරන මට මෙදා පාර ඒක කරන්න උනේ නැත්තෙ අප්පච්චි පාන්දර දෙකේ ඉඳන් දොර කඩන්න ගත්ත නිසා... (පාන්දර එකත් පහුවෙලා ඇඳට වැටුන අසරන මම 🥲🥲)

"ලොකු බබා යන්න ලෑස්ති වෙන්න පරක්කු වෙන්න එපා"

"ලොකු බබා දැන් දෙකයි තිහයි...."

ඊලඟ පාර මලපැනල 🤭

"නැගිටිනව දැන් බස් එක ගියොත් ඔය කැලෙන් එලියට එන්න වෙන්නෑ... නැගිටිනව ලමයො...."

ඒ පාර නම් නැගිට්ට... නාල කරල පාන්දර තුන වෙද්දි අප්පච්චි එක්ක කොට්ටාවට ගියා... එතනින් එහාට ගමන බස් එකේ.... අවිස්සාවේල්ලට ගිහින් එතනින් පාන්දර පහට තියෙන පලවෙනි දැරණියගල බස් එක අල්ල ගන්න ඕනි දැරණියගලින් පාන්දර 06.30ට තියෙන පලවෙනි උඩමාලිබොඩ බස් එක අල්ල ගන්න නම්... කෝම හරි බස් ටික ගානට අල්ල ගන්න වගේම හොඳට කාල බීල එන්නත් වෙලාව තිබ්බ ontime ගිය නිසා...

උඩමාලොබොඩ බස් එකේ ටී ෆැක්ට්‍රි එක ගාවින් බහින්න ඕනි... ඔන්න මම බහින්න කලින් බස් එකේ රියදුරු මහත්තය පෙන්නුව අන්න ඉන්නව ඔයාගෙ ජයවීර අයිය කියල... බස් එක එන්නත් කලින් එයා පාර ගාව... ඔන්න ඒ බස් එකේ ආව තව ලමයි 10ක් විතර නඩ දෙකක... ඒ අය යන්න ක්‍රමයක් හොයන් ඇවිත් තිබ්බෙ නෑ... ඒ පාර ජයවීර අයිය කීවෙ ඒනම් කට්ටියම ලොරියෙ යන් කියල... ඔන්න ඉතින් ලොරියෙ නැගල සේරම අය පන්දෙණි ඔය ගාව ධර්මෙ මාමගෙ දේවාලෙ ලඟට ආව... යාතිකා කාරිය අහවර වෙලා අනික් ලමයින්ට යන්න ඇරල මම කපටිය කයියක් දාන් පැය බාගෙකට වඩා ලේට් උනා හිතාමතාම.. මට ඕනි තනියම යන්නනෙ... ඔන්න ඉතින් පන්දෙණියේ මාගල් ඔයෙන් එතෙර වෙලා සිරිපා මලුව දක්වා තනියම මම මගේ ගමන ආරම්භ කලා...

ජයවීර අයියගෙ ලොරියෙ යන්න එයාව සම්බන්ද කර ගන්න 0769875005. අවශ්‍ය අයට කලින් දවසෙ උනත් ඇවිත් එයාලගෙ ගෙදර නැවතිලා යන්නත් පුළුවන්... හරිම සාදාරණ හිත හොඳ මනුස්සයෙක්.... එක දවසක් කතා කරල කාලයක් දන්න කෙනෙක් වගේ උදව් කලේ මට 😌

රකිමින් විඳින්න 💚🌿

විශ්වනී

16.03.2025