O futuro dos museos en comunidades en cambio constante. Venres sesión da mañá

COLOQUIO GALEGO DE MUSEOS LOCAIS
O futuro dos museos en comunidades en cambio constante
14 e 15 de novembro de 2025
Santiago de Compostela

O Museo do Pobo Galego creou hai vinte anos o Instituto de Estudos das Identidades (IEI), departamento dedicado á recollida, análise e espallamento de materiais da nosa cultura e tradición, e con motivo deste aniversario acordou organizar, coa colaboración do Consello da Cultura Galega e o Consello Galego de Museos, un encontro sobre museoloxía titulado O futuro dos museos e coleccións visitables en comunidades en cambio constante, centrado nos moitos museos, coleccións e espazos museísticos locais estendidos por toda Galicia.

A Comisión encargada da organización estableceu a duración do encontro en dúas xornadas, os días 14 e 15 de novembro, e a súa sede será o Museo do Pobo Galego, en Santiago de Compostela. A nosa intención é proporcionar un lugar e tempo de encontro entre persoas vinculadas a entidades destas características nos que poidan manifestar a súa situación, problemática e perspectivas de futuro, poñendo en común as posibles sinerxías.

As xornadas comprenderán tres tipos de actividades: relatorios, mesas redondas con participación de representantes de museos locais, e tamén unha presentación de actividades do IEI, especialmente o labor do Arquivo do Patrimonio Oral da Identidade (APOI), que consideramos de interese particular para as entidades convocadas. Despois de cada sesión haberá tempo para o debate e, finalmente, elaboraranse unhas conclusións xerais que serán dadas a coñecer publicamente.